El ‘Principado’ desoi el clamor vecinal y anuncia l’aprobación de tres nuevos Parques de Bateríes n’Uviéu, en zona rural, terrenos non urbanizables y cerca de viviendes
Manifestamientu contra los parques de bateríes
Pesi a la fuerte oposición vecinal, visible nel manifestamientu cellebráu esti sábadu contra la proliferación de parques de bateríes n’Asturies, el Gobiernu sigue avanzando n’autorización d’esti tipu d’infraestructures. Cuasi como una provocación, tres díes depués de que centenares de vecinos reclamaren el fin de la so instalación, el Boletín Oficial del Principáu d’Asturies (BOPA) asoleya l’autorización de tres nuevos parques de bateríes n’Uviéu, nuna dinámica que munchos colectivos califiquen yá como una auténtica espiral d’autorizaciones enerxétiques.
Los nuevos proyectos prevén la instalación de 72 contenedores de bateríes na zona de Los Arenales, en suelu non urbanizable. Trátase d’una área rural con centenares de vecinos nel so entornu, onde se presentaron miles d’alegaciones en contra. Les instalaciones proyectaes alcuéntrense a escasa distancia de viviendes de Los Arenales, La Manxoya, Covagonda, La Brañella, El Calderu, El Bosque, Les Cruces, La Granda, Vidayán, Fitoria y San Lázaro, ente otros núcleos.
Con estes autorizaciones, n’Uviéu son yá once los parques de bateríes en tramitación, una cifra que pon de manifiestu la intensidá cola que l’Alministración autonómica ta apostando por esti modelu d’almacenamientu enerxéticu, ensin que se tea teniendo en cuenta —según denuncien los colectivos vecinales y ecoloxistes— la capacidá real del territoriu nin l’impactu sobre la población.
Resulta especialmente llamativa esta decisión si se tien en cuenta que nel pasáu añu la Comisión d’Urbanismu y Ordenación del Territoriu d’Asturies afitare criterios pa esti tipu d’instalaciones, esixendo una distancia mínima de 1.000 metros a núcleos rurales y de 500 metros a instalaciones ganaderes. Nesti casu, estes distancies nun se cumpliríen, pero la empresa promotora defende que se trata de ‘suelu mineru degradáu’, una interpretación que’l Principáu acepta y da por válida.
La situación xenera inquietú pola cantidá de parques de bateríes que tán tramitándose y autorizando n’Asturies en rellación col consumu eléctricu actual y previstu, mui perriba —según denuncien les plataformes— y del compromisu políticu teóricu de llendar la capacidá d’almacenamientu a 300 MW.
Un de los principales argumentos de la oposición vecinal ye la escasa distancia ente los contenedores de bateríes y les viviendes, una proximidá que podría implicar una mayor esposición a campos electromagnéticos, con posibles efectos sobre la salú de les persones y de los animales. Los colectivos recuerden que distintos estudios científicos señalen que una esposición excesiva a campos electromagnéticos pue aumentar el riesgu de ciertes patoloxíes, ensin que esista entá una regulación clara que garantice la protección de la población.
A ello súmense los riesgos asociaos a posibles fugues térmiques o incendios, con consecuencies potencialmente irreversibles tanto pal mediu ambiente como pa la salú humana. En casu de siniestru, les bateríes d’ión-llitiu puen emitir sustancies irritantes, corrosives y tóxiques, lo que fai imprescindible disponer de medios d’estinción específicos. Delles fontes téuniques señalen, amás, qu’esplumes, CO₂ u otros axentes podríen nun ser efectivos, siendo l’agua l’únicu métodu eficaz, col riesgu añadíu de contaminación de grandes volúmenes d’agua.
Anguaño, los parques de bateríes propuestos n’Asturies presenten tamaños mui distintos, dende instalaciones d’un únicu contenedor hasta macroproyectos con hasta 72 contenedores. Calcúlase que yá se conocen al menos 86 proyectos repartíos por numberosos conceyos, ente ellos Salas, Salime, Siero, Llanera, Mieres, Cangues, Uviéu, Avilés, Corvera, L.lena, Colunga, Villaviciosa, Soto Ribera, Les Regueres, Xixón, Candamu, Gozón, Piloña, Grau, Carreño, Cangas, Llangréu, Ribadedeva, Ribeeseya y Samartín del Rei Aureliu.
La continuidá d’estes autorizaciones, pesi a la oposición social espresada nes cais, evidencia que la política gubernamental ye priorizar el beneficiu empresarial nuna carrera por captar proyectos enerxéticos ensin planificación territorial clara nin normativa específica que garantice la protección de los núcleos habitaos ya’l mediu rural asturianu.
Nesi sen, dende Andecha Astur lleven más d’un añu denunciando non solo los ellevaos riesgos tósicos y de seguranza qu’impliquen estes instalaciones, sinón l’ausencia de participación ciudadana nel procesu, sorrayando la falta de soberanía de los asturianos a la de decidir que pasa na so propia casa “Esti ye un casu más de lo que supón la mal llamada ‘transición enerxética’ impuesta dende Madrid: una estratexa al serviciu de grandes corporaciones, que convierte Asturies nun apéndiz industrial y nun territoriu de sacrificiu” declaren. Y ye que estos contenedores d’enerxía nun tan destinaos a favorecer l’autoconsumu de lletricidá nin la soberanía enerxética, sinón pa garantizar el negociu de les empreses que controlen los macroparques eólicos y solares del Estáu. “La enerxía que se va almacenar nun ye pa les families asturianes, nin pa la pequeña industria, nin pal texíu llocal, sinón pa ser vendío al mejor postor nel mercáu estatal o europeu… los asturianos vamos carecer los daños y los riesgos ensin beneficios sociales nin económicos reales pal país”.
Llucía F. Marqués
This work is licensed under a Creative Commons Attribution 4.0 International License.
