La muerte d’un trabayador de Astilleros Gondán y la d’un gruista fallecíu n’acidente de tráficu mientres trabayaba en Xixón abren de manera tráxica’l recuentu de víctimes mortales llaborales n’Asturies nel entamu d’esti añu. 

Instalaciones d’Astilleros Gondán

Un trabayador, de 59 años y con iniciales M. A. B. P., perdió la vida nes últimes hores mientres desendolcaba la so xornada llaboral nel astilleru de Gondán (Figueras, Castropol). Según les primeres declaraciones de los testigos recoyíes pola prensa, l’home fore estrapalláu por una gran estructura. Ta pendiente determinar les causes concretes del accidente, si hebio neglixencia y si s’aplicaben de forma correuta les midíes de prevención.

A esta muerte súmase la d’un gruista en Xixón, conocía tamién nesta mesma selmana, configurando un entamu d’añu especialmente duru nel ámbitu de la seguranza llaboral. 

Les cifres del añu pasáu amuesen que nun se trata d’episodios aisllaos. Según los datos oficiales del Institutu Asturianu de Prevención de Riesgos Llaborales, espublizaos pola Sociedá Asturiana d’Estudios Económicos y Industriales (Sadei), en 2025 rexistráronse n’Asturies 12.242 accidentes de trabayu con baxa. D’ellos, 22 fueron mortales, una cifra que nun se daba dende 2018, cuando se contabilizaron 26 fallecimientos nel país.

Del total d’accidentes con baxa del añu pasáu, 12.126 fueron seles y 94 graves, mentanto que los mortales repartieronse ente 20 producíos en xornada de trabayu y 2 in itinere. Amás de ser la cifra más alta de los últimos siete años, supón un fallecíu más que l’añu anterior, nel que yá se dispararen les alarmes pol aumentu de siniestros mortales.

Esti contestu fai que les muertes conocíes nesta selmana nun puedan interpretase como fechos aisllaos, sinón como parte d’un problema estructural que sigue ensin resolvese. La repetición d’accidentes graves y mortales apunta a deficiencies persistentes na prevención, na formación y nel control de les condiciones de seguranza, especialmente en sectores industriales y de riesgu. La siniestralidá llaboral sigue siendo una de les grandes asignatures pendientes n’Asturies, y cada nueva muerte recuerda que les estadístiques tienen nomes, edaes y families.

Llucía F. Marqués