Anclada alredor del 20%, la fiendasalarial nun ye un fenómenu coyuntural, sinón un problema de cadarma del mercáu de trabayu que se retroalimenta de la parcialidá, la organización desigual del tiempu de trabayu y la distribución desequilibrada de los curiaos

Cuasi’l 70% de les muyeres cobren el SMI o menos

En 2024, el salariu mediu añal foi de 28.627 euros, pero les muyeres percibieron 5.158 euros menos que los homes. Esta diferencia tradúcese en bases de cotización un 16% inferiores y acaba xenerando una fienda del 39% na pensión media al llegar a la xubilación. La desigualdá, por, acompaña a les muyeres a lo llargo de tola so vida llaboral y tien efeutos direutos sobre la so autonomía económica y la so salú.

Un de los principales mecanismos que sostienen esta fienda ye la parcialidá. Tres de cada cuatro persones que trabayen a tiempu parcial son muyeres (75%). Delles faenlo por razones de curiaos (15%) y cuasi la metá (47%) porque nun atopen un puestu a xornada completa. Nel últimu añu, l’emplegu parcial medró un 3,5% y el 77% de los 86.000 nuevos contratos d’esti tipu recayeron en muyeres. Esta realidá nun pue interpretase como una elección llibre, sinón como la respuesta individual a un sistema de curiaos insuficiente y a una organización del trabayu que penaliza la conciliación.

La parcialidá concéntrase sobre manera nel sector servicios, onde les muyeres son mayoría. Hostelería, comerciu o servicios alministrativos superen la media d’emplegu a tiempu parcial de la economía, y nestos ámbetos les muyeres absorben más del 60% d’estes xornaes. El resultáu ye una homoxeneización a la baxa de los salarios. Nun ye casualidá que les muyeres representen el 68% de les persones que se concentren nos tramos salariales más baxos.

Les trabayadores estranxeres sufren una doble penalización. Amás d’una mayor incidencia de la parcialidá, soporten una fienda salarial del 23%, que puede algamar el 37% nel casu de muyeres europees non comunitaries. La precariedá, la falta de reconocimientu de la esperiencia previa y la concentración en sectores infravaloraos agraven una desigualdá yá estructural.

Dende’l puntu de vista sectorial, les actividaes venceyaes a los servicios rexistren fiendes perriba de la media: actividaes alministratives y auxiliares (42%), profesionales, científiques ya intelectuales (30%), comerciu (29%), finances y seguros (26%) o inmobiliaries (25%). La hostelería, anque s’asitia na media (19%), sigue siendo’l sector con salarios más baxos de la economía, hasta un 40% inferiores.

Los datos amuesen que la fienda salarial nun respuende a diferencies d’esfuerzu nin de cualificación. Les muyeres son mayoría ente la población con estudios universitarios, pero siguen infrarrepresentaes nos puestos de direición y reciben menos complementos salariales, munchos d’ellos venceyaos a criterios de disponibilidá horaria incompatibles cola asunción de curiaos.

Frente a esta situación, ye imprescindible actuar sobre’l tiempu de trabayu. Regular la parcialidá, afitar llimites mínimos de xornada y consolidar hores complementaries ye clave pa frenar la precarización. Amás, resulta necesario avanzar na reducción de la xornada ordinaria en díes completos, garantizar descansos de calidá en fines de selmana, asegurar un repartimientu equitativu de les hores adicionales y reforzar la tresparencia retributiva y les auditoríes salariales.

Zarrar la fienda salarial de xéneru nun ye namás una cuestión de nómines. Ye una esixencia democrática que pasa por tresformar la organización del trabayu y el sistema de cuidados dende la corresponsabilidá y la intervención pública. Solo asina va ser posible garantizar una vida digna y en condiciones d’igualdá real ente muyeres y homes n’Asturies.