Los responsables de les corresponsalíes de RTPA dicen “¡valió!”; el colectivu que lleva dos décades percorriendo tol país pa cuntar lo que pasa protagoniza l’actualidá alzando la voz pa denunciar una situación llaboral incaltenible
Entrada a la sede de la RTPA en Xixón
Dende va 20 años, los corresponsales ellaboren alredor del 80 % de los conteníos que s’emiten a diariu en TPA Noticies, especialmente los fines de selmana, cuando algama hasta’l 90 %. Son ellos y elles los qu’averen l’actualidá a cada requexu d’Asturies, los que dan voz a los conflictos, a les cellebraciones, a les esmoliciones y a les alegríes de la xente. Sicasí, denuncien, esi papel central nel serviciu públicu de comunicación nun tien reflexu nes sos condiciones de trabayu.
Anguaño, la plantiya ta formada por 44 trabayadores: redactores, operadores de cámara, coordinadores y personal de producción que trabayen per tola xeografía asturiana ya inclusive fuera d’ella. Faenlo en réxime de subcontrata, dientro d’una llicitación pública, y en condiciones que’l colectivu califica ensin rodeos de precaries. Los sueldos, que nun superen los 1.500 euros mensuales con toles pagues incluyíes, nun correspuenden nin cola formación nin cola esperiencia acumulada tres dos décades de trabayu continuu.
La precariedá materializase tamién nel día a día: nun tienen oficines, redacten y editen nos coches o en cafeteríes, y carguen en casa les bateríes de cámares y ordenadores ensin recibir compensación dalguna. Una situación que se normalizó col pasu de los años, pero que ye incompatible cola dignidá llaboral que merez un serviciu públicu.
El colectivu denuncia que camudar esta realidá ye bien difícil nun sector onde’l conveniu de la producción audiovisual pasó quince años ensin anovase y onde la última actualización, en 2024, nun supunxo una meyora real. Magar la bona voluntá y el compromisu amosáu pola plantiya, les condiciones nun solo nun meyoraron, sinón que fueron a peor.
La direición d’informativos, la direición xeneral y el conseyu d’alministración de RTPA conocen dende va tiempu esta situación. Tamién el Gobiernu del Principáu d’Asturies y los grupos parlamentarios de la Xunta Xeneral. Sicasí, según denuncien los trabayadores, les responsabilidaes van pasando d’unos a otros, ensin qu’naide asuma soluciones concretes. Les empreses que concursen a les llicitaciones aleguen sistemáticamente que los contratos nun son rentables, anque’l próximu contratu va medrar casi un 20 % na so cuantía ensin que se prevea una meyora de les condiciones llaborales.
L’efeutu d’esta situación ye evidente: cansanciu, incertidume y una fuga continua de profesionales que deciden dexar el puestu pa buscar una vida llaboral más estable. Una perda de capital humanu que tamién afecta a la calidá del serviciu públicu que recibe la ciudadanía.
Los delegaos de personal de Videoreport n’Asturies recuerden que munchos d’ellos formen parte del proyectu dende antes de que RTPA entamara les sos emisiones regulares. Que vivieron col país los sos momentos más duros y los más alegres. Que tuvieron al llau de trabayadores y colectivos n’innumberables conflictos llaborales. Y que, dempués de tardar quizá demasiáu, sienten que llegó’l momentu de dicir ¡valió!.
“Somos la voz de munchos asturianos y asturianes cuando tienen un problema”, afirmen. Y esi compromisu col serviciu públicu y cola sociedá asturiana namás pue caltenese —alvierten— si se garantiza daqué tan básico como trabayar en condiciones dignes.
Susana Sela
This work is licensed under a Creative Commons Attribution 4.0 International License.
