10.618 places d’aloxamientos vacacionales son viviendes. Hai más de 300 persones ensin llar en Xixón, 7.000 xixoneses viven en pisos compartios y más de 30.000 xixoneses d’ente 18 y 35 años viven entá colos sos pas por nun poder independizase económicamente, nun mercáu de vivienda que desixe’l 70% del salariu pa pagar una casa

El coste de la vivienda queda fuera de les posibilidaes de la población

Xixón ta viviendo una tormenta perfecta nel mercáu de la vivienda. A la xubida continuada de los precios súmense dos fenómenos qu’actúen como aceleradores: l’espansión de les viviendes vacacionales y la compra especulativa por parte de non residentes. El resultáu ye un drechu básicu cada vez más difícil d’exercer y un aumentu palpable de la esclusión residencial.

Anguaño contabilícense 17.663 aloxamientos turísticos en Xixón, de los que 10.618 places correspuenden a viviendes que dexaron de tar disponibles pal mercáu residencial. Esto supón miles de pisos que yá nun sirven pa vivir de mou estable, sinón pa xenerar rentabilidá turística. Cada vivenda turística ye una vivenda menos pal alquiler de llarga duración, lo que tensa l’oferta y emburria los precios escontra arriba.

El resultáu ye evidente. El mercáu residencial en Xixón peslló 2025 con una escalada interanual del 14,4 % nel preciu mediu de la vivienda, un datu históricu. Nel alquiler, la situación ye entá más grave: el preciu mediu avérase peligrosamente a los 900 euros mensuales (846 euros, según datos municipales). Esta cifra supón más del 70 % del Salariu Mínimu Interprofesional recién actualizáu y más del 80 % del Ingresu Mínimu Vital d’una familia de tres miembros. Too ello nun contestu nel que los salarios baxaron un 1,4 %, lo que fai qu’el esfuerciu pa pagar la vivienda seya incaltenible pa una parte creciente de la población.

Paralelamente, la vivienda convirtióse nun activu d’inversión. L’añu pasáu rexistráronse cerca de dos mil compraventes de viviendes por parte de non residentes n’Asturies, de les que alrodiu de 500 corresponderíen a Xixón. Nun son, na so mayoría, viviendes destinaes a residencia habitual, sinón a segundes viviendes o, mayormente, a operaciones especulatives que busquen rentabilidá vía alquiler, turismu o reventa. Esta dinámica retrae entá más vivienda del mercáu ordinariu y contribúi a la inflación de precios.

Les consecuencies sociales son directes. Alrodiu de 300 persones viven ensin llar en Xixón, una cifra incompatible con una ciudá que dispón de miles de viviendes usaes como productu turísticu o financieru. Pero la esclusión residencial nun s’espresa solo na cai: tamién s’esparde n’estratexes de supervivencia cada vez más comunes.

Una d’elles ye’l pisu compartíu, con precios que ronden los 350 euros por habitación. Esta opción, qu’hai unos años yera transitoria y asociada a la mocedá, convirtióse nuna solución forzada pa alrodiu de 7.000 xixoneses que nun pueden facer frente al alquiler completu d’una vivienda. Compartir nun ye una eleición llibre, sinón la única vía pa siguir viviendo na ciudá.

La situación impacta de mou especial na xente moza. La edá media d’emancipación algama los trenta años, y el 68 % de les persones mayores d’edá y menores de 35 años —unos 30.000 xixoneses— sigue viviendo cola familia. Nun ye por falta de voluntá, sinón por imposibilidá material. Con salarios baxu presión, alquileres disparataos y una oferta cada vez más escasa, la emancipación convirtióse nun llogru escepcional.

Xixón enfréntase asina a una contradicción fonda: mientres la vivienda xenera beneficios crecientes como negociu, vivir dignamente na ciudá ye cada vegada más difícil. L’aumentu del ensillarismu, la dependencia familiar forzada y la precarización residencial nun son fenómenos aisllaos, sinón pieces d’un mesmu problema estructural. Si la vivienda sigue tratándose prioritariamente como mercadería y non como drechu, el conflictu social va siguir agravándose. Entantu, la solución del conceyu pa torgar que la xente durma na cai ye… retira-yos les tiendes de campaña. 

This work is licensed under a Creative Commons Attribution 4.0 International License.