No que va d’añu 2026, la situación de les carreteres asturianes convirtióse nun espeyu nidiu del abandonu istitucional que padecen munches partes del país, especialmente les zones rurales. La repetición continua d’argayos y esbarrumbes nun pue siguir desplicándose namás pola orografía o pola meteoroloxía: ye la consecuencia directa d’una política de caltenimientu insuficiente, reactiva y tardía, que llega siempres cuando la carretera yá cayó, a vegaes enriba de xente
Argayu en Navia
Dende primeros de xineru produxéronse diez argayos d’importancia en delles víes del país. n’Ayer, un argayu na AS-112 cortó l’accesu al puertu Braña (S. Isidro); en Grandas de Salime, la AS-14 careció nuevos desprendimientos que forciaron cortes y obres d’emerxencia; en Mieres, una peña cayó sobre la AS-375, una vía básica pal accesu al hospital y pa la movilidá diaria. Na rede ferroviaria, n’Olloniego, una cayía de piedres dañó un tren de Cercaníes, ensin causar feríos, pero demostrando que’l problema afecta a toles infracadarmes y non solo al tráficu rodáu.
La situación repitióse en Samartín del Rei Aureliu, onde argayos y fundimientos comprometieron accesos a núcleos de población; en Castropol, con desprendimientos que pusieron en riesgu viviendes y caminos; y ayeri en Ponga, onde un argayu na PO-2 sepultó la carretera d’accesu a Viegu, dexando la llocalidá incomunicada y obligando a rodeos llargos, llentos y peligrosos. Ensin escaecer l’argayu del monte Corberu que va dies menacia delles cases en Ribeseya ya’l que cayó a escasos metros de les viviendes en La Guía.
Especialmente grave foi lo asocedío’l 14 de febreru nel Corredor del Navia, al so pasu pol conceyu de Navia, cuando un argayu de grandes dimensiones cortó una de les principales víes de comunicación ente la mariña occidental y l’interior. Esti corte, sumáu a otros producíos nos díes anteriores na mesma carretera, evidenció hasta qué puntu una vía estratéxica pue convertise nuna trampa cuando nun esiste prevención nin caltenimientu continuu. Pa munches persones, esto supón aumentos importantes nos tiempos de desplazamientu pa llegar a servicios sanitarios, centros educativos o llugares de trabayu.
Estos fechos nun son casos aisllaos nin inevitables. Les carreteres d’Asturies son la base de la cohesión territorial y social del país, y el so deterioru tien consecuencies direutes y fondes. Cuando una carretera corta, nun se xenera solo una molestia: créase aislamientu, increméntase’l riesgu vial y consolídense puntos prietos permanentes onde cada lluvia fuerte pue aniciar un nuevu argayu.
Les consecuencies páguenles siempres los mesmos: vecinos obligaos a facer decenes de quilómetros de más, ambulancies con rutes más llargues y peligroses, tresporte escolar afectáu, comercios y actividá económica penalizaos, y una sensación xeneralizada d’abandonu nes zones rurales. Reparar dempués de cada desprendimientu ye caro, ineficaz y irresponsable. Lo que fai falta ye una estratexa seria de caltenimientu preventivu, con estabilización de taludes, drenaxes eficaces y planificación viaria acorde cola realidá xeográfica d’Asturies.
Lo que ta pasando en 2026 nun ye solo una suma d’argayos: ye un fracasu políticu y técnicu. Si nun se cambia’l modelu, les carreteres van siguir cayendo… y con elles va siguir cayendo tamién el drechu de munches partes del país a tar comunicaes con dignidá.
This work is licensed under a Creative Commons Attribution 4.0 International License.
