Nuevu númeru de la revista Asturies, memoria ences d’un país qu’edita la Fundación Belenos
La revista Asturies, memoria encesa d’un país, editada pola Fundación Belenos, vien d’asoleyar el so númberu 44, el postrer exemplar d’una publicación que dende 1996 vien convirtiéndose nun referente imprescindible pal estudiu, la investigación y la divulgación de la historia, la etnografía y la cultura tradicional d’Asturies.
Con periodicidá añal, la revista caltién una llinia editorial centrada na recuperación y análisis del patrimoniu material ya inmaterial del país, xuntando aportaciones d’historiadores, antropólogos, investigadores y divulgadores. Esti númberu sigue esa trayeutoria con un conxuntu d’artículos qu’abarquen dende la mitoloxía y l’arte medieval hasta la historia militar, la relixiosidá popular o’l patrimoniu sidreru.
Artículos y autores del númberu 44
Ente los conteníos destacaos del númberu 44 d’Asturies, memoria encesa d’un país atópense trabayos como «Llibélules y caballinos del diañu n’Asturies», firmáu por Ángel Morán y Julián Rufino Gómez, qu’analiza la presencia y el significáu simbólicu d’estes figures nel imaxinariu popular asturianu.
La historia ocupa tamién un llugar relevante con artículos como «El xeneral asturianu Sancho Pardo de Donlebún y el ‘socorro’ a Bretaña (1590)», de Luisa Danigo, que recupera un episodiu pocu conocíu de les rellaciones ente Asturies y l’ámbitu atlánticu nel sieglu XVI.
L’arquiteutura relixosa y la devoción popular tan presentes en trabayos como «La capiella de San Patriciu en Pancar, Llanes», de Alfonso Sánchez Pozo, qu’afonda na historia y el valor simbólicu d’esti espaciu singular del Oriente asturianu.
El patrimoniu cultural venceyáu a la sidre tien tamién protagonismu nel artículu «El patrimoniu sidreru asturianu», de Inaciu Hevia Llavona, qu’analiza la importancia histórica, social y cultural d’un elementu central de la identidá asturiana.
Completen el númberu otros estudios dedicaos a la etnografía, les races autóctones, la arquitectura tradicional o l’análisis de pieces y oxetos del pasáu, con aportaciones d’autores como Gausón Fernande Gutierri o Santiago Álvarez Bartolomé, ente otros.
Seiciones fixes y continuidá editorial
Amás de los artículos monográficos, la revista caltién les sos seiciones habituales, como «Memoria Gráfica d’Asturies», «Arcu Atlánticu» o «L’Estoxu», que complementen los estudios escritos con material gráfico, análisis comparativos y recueyes documentales.
Dende la so primer publicación, Asturies, memoria encesa d’un país vien construyendo un corpus documental de gran valor pa entender la evolución histórica y cultural d’Asturies, con más de cuarenta númberos editaos hasta la fecha. El númberu 44, yá disponible en llibreríes especializaes y al traviés de la Fundación Belenos, reafirma’l compromisu de la revista cola defensa y divulgación de la memoria colectiva del país.
This work is licensed under a Creative Commons Attribution 4.0 International License.
