Andecvha Astur denuncia que l’Ayuntamientu Xixón allíniase cola estrema derecha española

La polémica alredor del denomáu monumentu del Simanques dio un pasu más dempués de que l’Ayuntamientu Xixón fixera pública la so negativa a promover la retirada del conxuntu escultóricu, escudándose nel so nivel de proteición urbanística. La decisión, presentada dende’l gobiernu municipal como un asuntu téunicu, foi contestada con dureza dende’l ámbitu del soberanismu y del movimientu memorialista asturianu.

Andecha Astur calificó la postura municipal como una toma de posición política y non como un simple exerciciu alministrativu. Nel so comunicáu, la organización denuncia que protexer un símbolu d’esaltación franquista supón alliniase col discursu de la estrema derecha española, que dende va años defende la permanencia d’esti tipu de monumentos baxo l’argumentu de la “historia” o la “proteición patrimonial”.

Dende Andecha Astur señálase que nel casu Simanques nun hai neutralidá posible: o se defende la memoria democrática o se normaliza la herencia simbólica del franquismu. A xuiciu de la organización, la negativa del Ayuntamientu a actuar implica aceptar como compatibles cola democracia homenaxes públicos a los protagonistas d’un golpe militar y d’una dictadura.

Na mesma llinia crítica sitúase la FAMYR, que vien recordando que’l casu Simanques nun ye un fechu aislláu. Dende’l movimientu memorialista destácase que n’Asturies persisten decenes de símbolos franquistes —plaques, monumentos y nomenclatura— que sobreviven ensin cambios sustanciales a décades de gobiernos autonómicos y municipales del PSOE y d’IU, pese a la esistencia de marcos llexislativos de memoria democrática. Les organizaciones de memoria tán estudiando y coordinando posibles posicionamientos públicos conxuntos, que deberán confirmase nos prósimos díes.

Ún de los argumentos más repitíos dende les instituciones pa xustificar la inacción ye que se trata d’“historia”. Un razonamientu que, p’Andecha Astur y FAMYR, resulta falaz. Retirar símbolos franquistes nun ye borrar la historia, sostienen, sinón dexar de cellebrala y d’otorga-y un llugar d’honor nel espaciu públicu. La historia, recuerden, estúdiase y analízase en llibros, archivos y centros educativos; los monumentos, sicasí, cumplen una función simbólica y política.

El contraste con otros países europeos suel apaecer como exemplu recurrente. En Alemaña, los símbolos nazis tán prohibíos nel espaciu públicu, ensin qu’ello se considere una amputación de la memoria histórica. Al contrariu, la prohibición forma parte del consensu democráticu sobro la necesidá d’un francimientu claru col pasáu totalitariu.

Nel casu de Xixón, la controversia vuelve poner enriba la mesa una cuestión de fondu: quién decide qué memoria ye visible n’Asturies y cuál queda marxinada. Pa los colectivos críticos, la decisión municipal evidencia que l’aplicación de la memoria democrática nun falla por falta de lleis, sinón por falta de voluntá política.

Mientres tanto, el monumentu del Simanques sigue nel so emplazamientu, convertíu nun símbolu que tresciende lo escultórico y que reabre un debate incómodu pa les instituciones: el de la pervivencia del franquismu simbólicu nun territoriu gobernáu durante décades por fuerces que se declaren democrátiques ya inclluso progresistes. Un debate que, a xulgar pol tonu de los comunicados y les reacciones sociales, ta llueñe de finar.

This work is licensed under a Creative Commons Attribution 4.0 International License.