Les declaraciones d’Adrián Barbón afirmando que “hai qu’asturianizar la FSA” son, ensin pretendelo, una confesión política de primer orde. Porque si una organización que lleva décades gobernando Asturies necesita agora “asturianizase”, la concluxón ye evidente: nunca lo foi. La Federación Socialista Asturiana nun foi, nin ye, una fuerza política asturiana, sinón una sucursal del PSOE español nel nuesu país, más pendiente de les directrices de Madrid que de los intereses nacionales, culturales y llingüísticos d’Asturies.

Nun falamos d’una cuestión simbólica nin retórica. La FSA ye responsable direuta del marcu políticu nel que vivimos: un Principáu y un Estatutu d’Autonomía impuestos dende Madrid, ensin que’l pueblu asturianu pudiera votalos, a diferencia de lo que sí ocurrió n’Andalucía, Galicia, Euskadi o Cataluña. Esa decisión —política y consciente— marcó un gobiernu autonómicu vinculáu a la monarquía española, feble, tuteláu y diseñáu pa que Asturies nun pudiera decidir sobre sigo mesma.

Nel mesmu senu, ye imposible falar d’“asturianización” ensin recordar que foi la FSA quien tuvo mayoríes abondo pa facer oficial la llingua asturiana y nun lo fixo. Y non solo eso: ye tamién quien, llexislatura tres llexislatura, sigue frenando cualesquier avance real, apostando por declaraciones bien sonantes, xestos vacíos y una política llingüística basada nel clientelismu y la propaganda. A día de güei, nun hai avances estructurales na normalización del asturianu: nin oficialidá, nin drechos plenos, nin seguridá xurídica, namás bones pallabres.

Falar de “defender la llingua d’Assturies” mientres se tolera —cuando non se practica— la so marxinación institucional ye una contradicción que yá nun engaña a naide. La represión del asturianu continúa: na alministración, na xusticia, nel sistema educativu y nel espaciu públicu. Y eso pasa col PSOE gobernando.

Resulta tamién revelador que Barbón s’amues agora especialmente esmolecíu pol avance de VOX. Convien, por embargo, recordar un fechu incómodu: foi’l propiu Barbón quien concedió a VOX grupu parllamentariu propiu nel Principáu na pasada llexislatura, pese a que nun tenía derechu a ello. Esa decisión supunxo dineru públicu, visibilidá mediática y proyección política pa la estrema derecha n’Asturies. Si güei-yos esmolez el monstru, convendría recordar quién lu cebó.

Asturianizar la FSA nun ye cambiar un discursu nin incorporar pallabres n’asturianu a los mítines. Asturianizar sedría romper col papel de sucursal, asumir un compromisu real col autogobiernu, cola oficialidá de la llingua d’Asturies, cola democracia y col derechu del pueblu asturianu a decidir. Tolo demás ye marketing.

Y a estes altures, Asturies yá nun necesita más marketing. Necesita verdá, responsabilidá y memoria.

This work is licensed under a Creative Commons Attribution 4.0 International License.