El riesgu de probitú y esclusión social n’Asturies sigue xorreciendo -más 1’5 puntos- y confirma una tendencia esmolecedora que afecta de manera direuta a miles de persones y, de forma especialmente grave, a la población menor d’edá.

Acordies l’Avance de Resultaos del XVI Informe Anual El Estáu de la Probitú, ellaboráu por EAPN-ES magar los caberos datos de la Encuesta de Condiciones de Vida del Institutu Nacional d’Estadística (INE), el 22,4 % de la población asturiana atópase en situación de riesgu de probitú y/o esclusión social, la conocida como tasa AROPE.

Esti porcentaxe supón un aumentu de 1,5 puntos porcentuales con respeuto al añu anterior y vien acompañáu d’un empeoramientu xeneralizáu de tolos indicadores. La tasa de probitú algama’l 17,2 %, 1,6 puntos más qu’un añu antes; la proporción de persones que viven en llares con baxa intensidá nel emplegu xubió hasta l’11,1 %, y la carencia material y social severa aumentó hasta’l 6,7 %. En conxuntu, una de cada cinco persones n’Asturies vive güei en condiciones que comprometen seriamente la so calidá de vida. Falamos d’alrodiu de 224.000 persones que nun puen llevar una vida digno, 67.000 en carencia severa, ello ye, nun pueden comer tolos díis y/o nun tienen un llugar curiosu onde vivir.

Estos datos nun puen analizase ensin tener en cuenta’l contestu económicu xeneral. La inflación acumulada nos últimos años, xunto cola subida caltenida de los precios de la vivienda, ta erosionando la capacidá adquisitiva de munchos llares. Pesi a que los indicadores macroeconómicos amuesen un llexerísimu xorrecimientu económicu, esti nun se tresllada a una meyora real de les condiciones de vida de la población, especialmente de los que yá partíen de situaciones de vulnerabilidá.

L’informe confirma, tanto n’Asturies como nel conxuntu del Estáu, una clara tendencia a la cronificación de la probitú, siendo la vivienda, según confirmen los datos estatales, un de los factores clave na xeneración y cronificación de la probitú.

N’Asturies, esti problema adquier un calter especialmente grave pa les families con menores. El xorrecimientu de la probitú infantil tien consecuencies a curtiu y llargu plazu: dificulta l’accesu a una alimentación afayaiza, a materiales escolares, a calefacción, a actividaes educatives y culturales y a un entornu estable onde medrar. La carencia material y social severa afecta direutamente al desendolcu físicu, emocional y educativu de los neños y neñes, perpetuando ciclos de desigualdá que resulten cada vegada más difíciles de romper.

Llucía F. Marqués

This work is licensed under a Creative Commons Attribution 4.0 International License.