El Boletín Oficial del Principáu d’Asturies (BOPA) espubliza güei la tramitación enerxética y la conexón d’un nuevu parque de bateríes en suelu rústicu nel conceyu de Llangréu. El proyectu correspuende a una instalación formada por trés contenedores de almacenamientu prevista na zona de Les Teyeres, en Lada, y, d’alcuerdu cola información catastral, trataríase del tercer parque d’esti tipu que ta tramitándose nel conceyu.
Pancarta contra la istalación de parques de bateries
Esta nueva tramitación súmase a otres autorizaes o en procesu y vuelve poner l’acentu nel eleváu númberu de parques de bateríes que ta impulsando’l Gobiernu del Principáu. Dende distintos colectivos y ámbitos críticos considérase llamativa esta espiral d’autorizaes en rellación col consumu eléctricu actual y coles previsiones futures, asina como col compromisu anunciáu pola Conseyería competente de llendar la capacidá total d’almacenamientu a 300 megavatios.
Una de les principales cuestiones qu’afloren alredor d’esti tipu de proyectos ye la escasa distancia ente los contenedores de bateríes y les viviendes en munches de les ubicaciones propuestes. Esta proximidá xenera inquietú pola posible contaminación electromagnética que podría afeutar a la vecindá y a los animales. Los colectivos que siguen estos espedientes señalen que la esposición prolongada a campos electromagnéticos ta asociada, según diversa bibliografía científica, a mayores riesgos pa la salú.
Amás, tamién s’alvierten los riesgos que supondríen estes instalaciones en casu de fuga térmica o d’incendiu, poles consecuencies potenciales pa los terrenos colindantes, pal mediu ambiente y pa la salú humana. Nesti tipu d’incidentes podrían emitise sustancies irritantes, corrosives y tóxiques, polo que se considera inadmisible la so implantación cerca de núcleos de población, espacios d’interés ambiental o zones protexíes. Nel casu de les bateríes d’ión de litiu, destácase amás la dificultá de la estinción d’incendios y el riesgu de contaminación deriváu del usu intensivu d’agua.
Los parques de bateríes propuestos n’Asturies presenten tamaños mui distintos, dende instalaciones d’un solu contenedor hasta proyectos con centenares d’unidaes. Hasta agora conózense 87 propuestes repartíes por numberosos conceyos, ente ellos Salas, Salime, Siero, Llanera, Mieres, Cangas d’Onís, Uviéu, Avilés, Corvera, L.lena, Colunga, Villaviciosa, Soto Ribera, Les Regueres, Xixón, Candamu, Gozón, Piloña, Grau, Carreño, Cangas del Narcea, Llangréu, Ribedeva, Ribadesella y Samartín del Rei Aurelio, lo que da idea de la rápida espansión d’esti tipu d’infraestructures nel territoriu asturianu.
Susana Sela
This work is licensed under a Creative Commons Attribution 4.0 International License.
