N’actual situación internacional ye fácil escaecese de que n’Asturies mesmo tenemos a seis persones preses por denunciar publicamente l’acosu a una compañera por parte’l so xefe; el Grupu Sofitu a Les Seis de La Suiza convoca un actu pa reclamar, nuevamente, la so llibertá.

Manifestamientu en defensa de Les Seis de La Suiza. Semeya d’archivu.

Llangréu sedrá esti domingu 8 d’agostu un escenariu de revindicación social y de solidaridá cola llucha sindical. Dende les 11 de la mañana, nel esterior del estadiu Ganzabal, va facese un mural collaborativu en defensa de Les Seis de La Suiza,  dirixíu pola illustradora Camikamikace y entamáu pol Grupu Sofitu Les 6 de La Suiza.

L’actu quier visibilizar el sofitu popular a les seis sindicalistes condergaes por defender a una compañera que denunciara situaciones d’acosu llaboral na pastelería La Suiza de Xixón. Una conderga que foi percibida por amplios sectores sociales y sindicales como un ataque direutu a los drechos sindicales y a la llibertá d’organización y protesta, y que provocó una onda de movilizaciones y denuncies dientro y fuera d’Asturies.

El mural concíbese como una obra abierta y colectiva, onde cualisquier persona pue participar, pintar, escribir o aportar la so voz. Nun ye solo una intervención artística, sinón un espaciu compartíu pa reivindicar que la defensa de los drechos llaborales nun pue convertise nun delitu y que la represión sindical nun tien cabida nuna sociedá democrática.

Dende’l Grupu Sofitu recuerden que’l casu de Les Seis de La Suiza nun ye un fechu aislláu, sinón parte d’una dinámica más amplia de criminalización de la acción sindical, y llamen a siguir ocupando l’espaciu públicu pa esixir xusticia, llibertá y la retirada de les condergues. La convocatoria del mural quier ser tamién un xestu de cuidu colectivu, d’alcuentru y de construcción común frente a la injusticia.

La cita d’esti domingu en Ganzabal ye una invitación abierta a participar, a implicase y a facer visible que Les Seis nun tán soles. Llangréu convertiráse asina nun altavoz de solidaridá y d’un mensaxe claro: defender drechos nun ye delitu, y la llucha sindical nun se calla.

Llucía FM