Un grupu d’enfermeres eventuales del área sanitaria V manifestáronse ayeri delantre les puertes del Hospital de Cagüeñes, en Xixón, pa denunciar la precariedá inadmisible de los sos contratos y el deterioru continuu de les condiciones llaborales na sanidá pública. La protesta, organizada al marxe de los sindicatos, vien acompañada d’una campaña de recoyida de firmes que yá suma alredor de 500 sofitos.

Les profesionales denuncien que los sos contratos, de percurtia duración —ente 40 y 70 díes—, non solo suponen una inestabilidá permanente, sinón que permiten cambeos de turnu improvisaos d’un día pa otru. Una situación que, según espresen, fai imposible conciliar la vida llaboral y personal y ye incompatible con cualquier idea mínima de planificación vital.

Les enfermeres recuerden que la eventualidá ye una realidá estructural del sistema sanitariu públicu. Al nun disponer de plaza fixa, son llamaes poles xerencies en función de les necesidaes del momentu, una práctica cronificada que lleva años repitiéndose. La situación actual, despliquen, nun ye nueva, pero sí llegó a un puntu de saturación que les llevó ‘a perder la paciencia’ y a entamar una respuesta colectiva.

Amás de la curtia duración de los contratos, denuncien la falta absoluta de previsión nes carteleres llaborales, que reciben mes a mes y, dacuando, na llende los plazos. Esa planificación, amás, nun ye fiable, y pue ser modificada en cualquier momentu, camudando turnos de mañana por turnos de tarde o alterando les cadencies de trabayu ensin avisu previu. Una precariedá organizativa que tien consecuencies direutes na vida diaria de les trabayadores y de les sos families, dificultando la xestión de guarderíes, cuidu de persones dependientes o, cenciellamente, el descansu.

La campaña de firmes, una vegada zarrada, sedrá treslladada a la dirección sanitaria del área de Xixón, a la que les enfermeres señalen como responsable direuta de la xestión de les carteleres y de la solicitude de contrataciones al Sespa. Anque les autorizaciones finales dependan del Serviciu de Salú del Principáu, recuerden que la organización diaria del trabayu ye competencia llocal y, por tanto, susceptible de meyora inmediata.

La protesta frente a Cabueñes pon enriba la mesa una realidá que se repite en munches árees del país: la salú pública caltiénse gracies a plantiyes precarizaes, sometíes a inestabilidá permanente y a una falta de respetu que choca de frente col discursu institucional de cuidu y calidá asistencial. Les enfermeres advirtieron de que nun van caltener el silenciu y que siguirán movilizándose mientres la precariedá siga siendo la norma y non la esceición.

Nel Dos Santos