Ante la cellebración xeneral pol fallu de la TSXA contra la incineración, el presidente Adrián Barbón torna posicionase en contra del pueblu y carga públicamente contra la decisión xudicial que paraliza la quema de residuos y biomasa na térmica de La Pereda, en Mieres, alegando, nun de los sos avezaos exercicios d’autocontradición, la necesidá de puestos de trabayu nuna cuenca fundía precisamente pola descarbonización desendolcada pol gobiernu del PSOE

Tres el fallu del Tribunal Superior de Xusticia d’Asturies (TSXA), qu’anuló la tramitación ambiental del proyeutu impulsáu por HUNOSA, Barbón non solo evitó asumir denguna responsabilidá política, sinón que reafirmó’l so compromisu de facer “todo lo posible” pa que la planta siga alantre.

El TSXA dio la razón al colectivu social Conceyu contra la Incineración y a la vecindá movilizada, al concluyir que la quema de residuos y biomasa nun ye una simple modificación de la central térmica, sinón una actividá nueva de coincineración, suxeta a requisitos ambientales más estrictos. La sentencia señala graves fallos na tramitación: indefinición téunica de la caldera, falta de caracterización del combustible sólidu recuperáu (CSR), ausencia d’información sobre la xestión de cenices y escories —que s’incrementaríen hasta les 120.000 tonelaes añales— y omisión del impactu sinérxicu con infraestructures como la escombrera de Pumardongo.

Pesi a ello, Barbón respondió nel plenu de la Xunta Xeneral con un discursu cerráu en defensa del proyeutu, calificándolo de “vital” pa HUNOSA y pa les Cuencas mineres y negando cualquier irregularidá. Llegó inclusive a minimizar l’alcuerdu xudicial, afirmando que namás obliga a “retrotraer” dellos trámites administrativos, y anunció la intención del Gobiernu de buscar otres víes pa siguir cola tramitación. Too ello, ignorando’l fondu del fallu y despreciando’l trabayu xurídicu y la movilización ciudadana que consiguieron frenar un proyeutu altamente contaminante.

Resulta especialmente grave que’l presidente insista en negar la realidá del proyeutu, afirmando que “nun ye una incineradora”, cuando la propia sentencia reconoz que se trata d’un procesu de coincineración con residuos y biomasa, con impactos ambientales serios y insuficientemente evaluaos. La defensa del usu de CSR, anque se presente como eventual, ye precisamente unu de los elementos que’l TSXA considera inaceptablemente indefiníu y peligrosu dende’l puntu de vista ambiental y de salú pública.

La posición del Gobiernu d’Asturies evidencia una contradicción de fondu: son los mesmos responsables políticos que xustificaron el zarru de la minería y de la industria pesada col argumentu de la descarbonización y del fin de la contaminación los que güei defenden un proyeutu de quema de residuos que pon en riesgu la salú de la población y el mediu ambiente. En nome d’una supuesta “deuda” cola Cuenca, preténdese imponer un modelu basáu na contaminación, la falta de tresparencia y el despreciu a la participación pública.

La sentencia del TSXA nun ye un accidente nin una cuestión menor. Ye’l resultáu d’un procesu de organización, denuncia y movilización social que volvió demostrar que la vecindá tien drechu a decidir sobre’l so territoriu y a defender la so salú frente a proyeutos impuestos dende enriba. Frente a ello, la reacción de Barbón supón un nuevu xestu de dispreciu escontra la ciudadanía afectada, apostando otra vuelta por salvar un proyeutu industrial fallíu en llugar de abrir un alderique real sobre alternatives caltenibles, modernes y xustes pa les Cuenques.

Llucía F. M

This work is licensed under a Creative Commons Attribution 4.0 International License.