El Principáu nun cumplea la hora esaniciar los monumentos facistes

La caducidá del procedimientu alministrativu pa la retirada del monumentu franquista del antiguu cuartel de Simanques, en Xixón, volvió encender la polémica alredor de les polítiques de memoria democrática del Principáu  La falta de resolución nel plazu llegal dexó, de momentu, ensin efeutu’l procesu iniciáu, lo que supón que’l símbolu siga visible nel espaciu públicu.

El procedimientu fora entamáu tres una solicitude presentada pola Federación Asturiana Memoria y República (FAMYR) en xunetu de 2024, pero nun se resolvió dientro’l plazu establecíu, polo que la Dirección Xeneral de Memoria Democrática comunicó la so caducidá conforme a la Llei del Procedimientu Alministrativu Común.

Reaciones del movimientu memorialista

Dende les entidaes memorialistes calificóse lo asocedío como una dexación de responsabilidaes por parte del Gobiernu del Principáu. Consideren que la falta de dilixencia alministrativa tien consecuencies polítiques y simbóliques, al permitir que un elementu de clara esaltación franquista siga presente nun espaciu d’usu públicu.

El monumentu, venceyáu a los “caídos por Dios y por España”, ta consideráu por estos colectivos como incompatible cola llexislación vixente en materia de memoria democrática.

La postura d’Andecha Astur

Nesti contestu, Andecha Astur sumóse a les crítiques, manifestando públicamente la so oposición a que símbolos franquistes sigan teniendo presencia institucional o pública n’Asturies. Dende la organización nacionaliega denunciaron la falta de voluntá política real del Principáu pa facer cumplir la llexislación y reclamaron una actuación decidida que garantice la retirada d’esti tipu de monumentos.

Andecha Astur vien señalando dende hai tiempu que la memoria democrática nun puede quedar en declaraciones xenerales, sinón que tien que traducise n’aiciones concretes, especialmente cuando se trata de símbolos d’exaltación de la dictadura.

La versión del Principáu

Dende la Dirección Xeneral de Memoria Democrática esplicóse que la caducidá del expediente ye un trámitu puramente alministrativu, y que la intención ye volver iniciar el procedimientu. Sicasí, el retrasu acumuláu y la proximidá de los tiempos políticos xeneren dubíes sobre si’l procesu va completase ensin nuevos retrasos.

Un alderique abiertu

La situación volvió abrir l’alderique sobre’l grau d’implicación real de les instituciones asturianes nes polítiques de memoria democrática. La caducidá del expediente del cuartel de Simancas súmase a otres crítiques sobre la falta de convocatories d’ayudes y l’escasu desarrollu prácticu d’estes polítiques.

Pa colectivos memorialistes y formaciones como Andecha Astur, lo asocedío nun ye un fechu aislláu, sinón un síntoma d’un problema más fondu: la distancia ente’l discursu institucional y l’actuación efeutiva frente a los legados del franquismu nel espaciu públicu asturianu.

This work is licensed under a Creative Commons Attribution 4.0 International License.