La sentencia del Tribunal Superior de Xusticia d’Asturies (TSXA) estima la demanda presentada pol Conceyu contra la Incineradora contra la modificación de l’Autorización Ambiental Integrada de la Central Térmica de La Pereda, en Mieres, bloquiando la quema de residuos y biomasa prevista por HUNOSA na instalación.

La movilización ciudadana foi clave pal ésitu de la reclamación

La sentencia da la razón al colectivu social que, tres meses de trabayu xurídicu y de coordinación cola vecindá de Mieres, denunció que la tramitación ambiental del proyeutu nun se fixera conforme a drechu. El fallu reconoz que nun se tán faciendo les coses correutamente y pon frenu a la pretensión de convertir La Pereda nuna planta de coincineración.

Dende’l conteníu de la sentencia, el Conceyu contra la Incineración destaca dellos aspectos clave. En primer llugar, el tribunal conclúi que la quema de residuos y biomasa supón una actividá nueva pa la central térmica y non una simple modificación sustancial, como pretendía HUNOSA. Trátase, según el TSXA, d’una actividá distinta —la coincineración— suxeta a requisitos ambientales específicos y más esixentes.

Amás, la sentencia señala que HUNOSA nun cumplió colos requisitos esixibles en elementos fundamentales del proyeutu. En concreto, apunta a les carencies na definición de les característiques téuniques de la caldera, desconocíes nel momentu de la evaluación ambiental, y a la falta de caracterización precisa del CSR, cuyes condiciones d’usu se mueven en márxenes d’enorme amplitú, susceptibles de xenerar impactos ambientales mui distintos.

Otru de los puntos más relevantes del fallu fai referencia a la xestión de los residuos resultantes de la combustión. La sentencia destaca que se desconoz el destín del incrementu significativu d’escories y cenices —que pasaríen de 72.000 a 120.000 tonelaes añales—, lo que impide la participación pública nel trámite ambiental sobre un asuntu esencial. El tribunal considera insuficiente la simple referencia a un “xestor autorizáu”, ensin mayores precisiones, y recuerda que tampocu se concretó’l sistema d’almacenamientu temporal d’esti enorme volume de residuos, más allá de la exclusión espresa de la escombrera de Pumardongo.

Precisamente, la sentencia reprocha tamién que nun se tuviera en cuenta la escombrera de Pumardongo nel procedimientu, prescindiendo d’evaluar los previsibles efeutos sinérxicos derivaos de la preesistencia d’esi depósitu.

Anque’l tribunal reconoz que dalgunes actuaciones podríen considerase válides, conclúi que nun lo son nos aspectos esenciales rellacionaos coles característiques téuniques de la caldera, la evaluación del impactu de la incineración, la definición del CSR y la xestión de los residuos xeneraos.

Dende’l Conceyu contra la Incineración reafírmense nel so oxetivu de torgar que se queme basura n’Asturies y faen un llamamientu a los grupos políticos y al Gobiernu del Principáu pa desendolcar una alternativa moderna y sostenible de xestión de residuos. La organización considera inadmisible que, tres décades d’inacción, con un Plan de Residuos caducáu y lloñe de los oxetivos llexales de reciclaxe, se pretendan tapar los fallos de xestión a costa de la salú de la población y del mediu ambiente.

Finalmente, el colectivu destaca que la organización y la movilización social volvieron ser decisives y anuncia que va siguir trabayando pa reducir y controlar la contaminación, asina como pa establecer sistemes de prevención y control que protexan tanto’l mediu ambiente nel so conxuntu como la salú de la población.

Susana Sela

This work is licensed under a Creative Commons Attribution 4.0 International License.