Col aumentu de la población n’edá de trabayar, son yá 40.100 les persones que n’Asturies pueden y quieren trabayar pero nun atopan emplegu. La tasa de paru xuvenil algama un inasumible 22,4% y cuatro de cada diez paraos son de llarga duración. Amás, cuasi un 6% de los llares asturianos tienen a tolos sos miembros en situación de desemplegu.
Les oficines “del paro” nun apurren soluciones reales al desemplegu
El paru xubió en 2.300 persones n’Asturies a lo llargo de 2025, hasta algamar los 40.100 desemplegaos al preslle del cuartu trimestre, lo que supón un aumentu del 6,1% respeuto al añu anterior, según los datos de la Encuesta de Población Activa (EPA) publicaos esti martes pol Institutu Nacional d’Estadística (INE).
Nel caberu trimestre del añu la tasa de paru asitióse nel 8,42%. La cifra total de persones desemplegaes ye la más alta rexistrada nun cuartu trimestre dende 2023
Nel mesmu periodu, creáronse n’Asturies 5.200 puestos de trabayu, un 1,2% más que nel trimestre anterior, lo que llevó’l total d’ocupaos hasta les 436.200 persones, al tiempu que la población activa asitióse en 476.300 persones, tres aumentar en 2.500 nos últimos trés meses, un 0,53%, bien perbaxo del xorrecimientu estatal del 2’8%.
Sicasí, esti sele xorrecimientu del emplegu nun se traduz nuna meyora de la so calidá. Nel últimu trimestre de 2025 namái medró l’emplegu por cuenta propia, el temporal y el de xornada parcial, mientres que baxó l’emplegu indefiníu y a xornada completa. El datu escuende un problema esmolecedor: el deterioru de les condiciones llaborales.
El xorrecimientu concéntrase principalmente nel sector públicu y nel sector servicios, ente que retrocede na industria y na construcción, un fechu especialmente preocupante pola importancia estratéxica de la industria pa la economía asturiana.
Nel Dos Santos
This work is licensed under a Creative Commons Attribution 4.0 International License.
