El conceyu de Siero yá cuenta con una nueva figura decorativa, la denominada “pitufina ferroviaria”, instalada nel marcu de la remodelación urbana n’El Berrón. La iniciativa, presentada dende l’alcaldía como un elementu simbólicu y d’acoyida y oxetu de toa triba de crítiques, volvió xenerar polémica, nesta ocasión dendee la Coordinadora de ONG del Principáu d’Asturies (CODOPA).

Dende la coordinadora señálase una contradicción evidente ente’l discursu institucional que destaca’l valor simbólicu d’estes figures —inesplicablemente presentaes como “embaxadores” de valores venceyaos a Naciones Xuníes— y la realidá presupuestaria del conceyu, que eliminó o dexó ensin dotación efeutiva les partíes de cooperación al desarrollu.

Crítica al simbolismu ensin conteníu real

La CODOPA denuncia que la sensibilización social y la solidaridá internacional nun puen quedar en xestos simbólicos, sinón que deben traducise en compromisos económicos y políticos reales. Nesti sen, cuestiona que se presuma públicamente de figures venceyaes a valores universales mientres nun se destina nengún recursu municipal a cooperación internacional, una política que consideren básica pa un conceyu del tamañu y capacidá económica de Siero.

Dende la coordinadora recuerden que la cooperación al desarrollu forma parte de los compromisos asumíos pol conxuntu de les alministraciones públiques, y que la retirada d’estes partíes supón un retrocesu nel compromisu solidariu del conceyu.

Un debate que vuelve al espaciu públicu

La instalación de figures d’esti tipu nun ye nueva en Siero y yá xenerara alderique n’ocasiones anteriores. Sicasí, nesta ocasión la crítica céntrase non nel gustu estéticu o nel usu del espaciu públicu, sinón nel fondu políticu del mensaxe que s’unvia a la ciudadanía.

Pa la CODOPA, nun ye coherente apelar a valores globales, a l’axenda de Naciones Xuníes o a la solidaridá internacional ensin acompañar esi discursu de polítiques públiques concretes que lo respalden. La organización reclama que’l conceyu recupere les partíes de cooperación y que se dea prioridá a acciones con impautu real sobre’l terrén, frente a iniciatives de calter puramente simbólicu.

La polémica abre, una vegada más, el debate sobro qué tipu de compromisu social ya internacional quien amosar les instituciones lLocales, y sobre’l papel que deben xugar los conceyos na cooperación al desarrollu acullá de xestos decorativos o campañes d’imaxe.

This work is licensed under a Creative Commons Attribution 4.0 International License.