L’asesinatu sistemáticu de periodistes en Gaza per parte del exércitu israelí ye ún de los fechos más graves y alarmantes del conflictu actual. Nun se trata de sucesos aisllaos nin de daños collaterales inevitables, sinón d’una dinámica repetida que tien como consecuencia direuta la eliminación de quien informen dende’l terrén y permiten al mundu conocer lo que ta ocurriendo.

La muerte de periodistes mientres exercen el so trabayu supón un ataque frontal contra la llibertá d’información, un derechu fundamental reconocíu pol derechu internacional y un pilar esencial de cualesquier sistema democráticu. Cuando se mata a quien informa, atácase tamién el derechu de la sociedá a recibir información veraz, contrastada ya independiente.

Resulta especialmente preocupante’l silenciu, cuando non la tibieza, de bona parte de los estaos occidentales. Gobiernos que se reclamen defensores de los derechos humanos eviten pronunciamientos claros, sanciones o condergues firmes, contribuyendo con ello a normalizar unos fechos que, n’otros escenarios, provocaríen reacciones inmediates. Esta doble vara de medir erosiona la credibilidá del discursu internacional sobre la defensa de la llibertá de prensa.

Pero tamién ye necesario señalar la responsabilidá d’una parte significativa de los medios de comunicación occidentales, que traten estes muertes con una frialdá estadística o una ambigüedá terminolóxica que dilúi les responsabilidades. La elección del llinguaxe nun ye neutra: cuando s’oculta l’autoría, cuando se recurre a formulaciones impersonales o cuando se relega la noticia a espacios secundarios, contribúyese a un silenciamientu que favorez la impunidá.

El periodismu nun pue exercese baxo l’amenaza permanente de la muerte. La impunidá nel asesinatu de periodistes abre un precedente estremu que pon en riesgu a informadores en cualesquier parte del mundu. Si informar dende Gaza tien como respuesta la eliminación física, el mensaxe que se tresmite ye que la verdá pue ser silenciada pola fuerza ensin costu políticu.

Dende Infoasturies consideramos imprescindible reclamar una conderga clara y ensin ambigüedaes de l’asesinatu de periodistes, asina como la esixencia de responsabilidaes y el respetu escrupulosu del derechu internacional humanitariu. Defender la llibertá de prensa nun pue depender de la identidá de les víctimes nin del aliáu que les mate.

Achantar énte estos fechos nun ye neutralidá: ye complicidá. Y ensin periodistes llibres y vivos, la democracia queda seriamente amenazada.

This work is licensed under a Creative Commons Attribution 4.0 International License.