Nun pudo ser: el marcador nun entamó a cero. La esperanza de que siquier el primer aconceyamientu del añu contra les violencies machistes se celebrara ensin víctimes viose truncada namás entamar 2026. No que va de xineru, cinco muyeres foron asesinaes por violencia de xéneru a manes de les sos pareyes o espareyes, según datos oficiales del Ministeriu d’Igualdá. Con estes confirmaciones, la cifra total d’asesinatos por violencia machista nel Estáu dende 2003 algama les 1.348 víctimes.
Na cabera concentración del 2025 visibilizáronse les cuasi 100 víctimes del añu
La cita ye mañana a les siete la tardi delantre la Gota Llechi, comu ca caberu miércoles de mes dende va años, visibilizando les víctimes pa que nun s’escaezan.
La violencia machista ye una llaceriosa realidá que sigue bien presente n’Asturies, onde se caltienen patrones de dominación patriarcal que se traduz en formes diverses de violencia continua escontra les muyeres. Ca añu rexístrense decenes de denuncies, agresiones y asesinatos machistes, nuna dinámica que pon de manifiestu la fonda desigualdá estructural qu’entá pervive na nuesa sociedá.
D’alcuerdu colos datos oficiales del Ministeriu d’Igualdá y del Institutu Asturianu de la Muyer, Asturies ta ente les comunidaes del Estáu con mayor númberu de denuncies por cada 10.000 habitantes. A estes cifres hai que sumar, amás, un volume importante de casos que nun lleguen nunca a los xulgaos, por causes como’l miéu, la dependencia económica o la presión social.
La violencia machista nun ye un asuntu priváu. Ye una manifestación brutal d’un sistema que reproduce la desigualdá y el control sobre les muyeres. Algamar una Asturies llibre de violencia machista implica un esfuerciu conxuntu, individual, social ya institucional. Mentanto, cada vida perdida, cada agresión, cada muyer que vive con medrana ye una derrota colectiva.
La violencia nun ye namás física. Tamién ye psicolóxica, económica, sexual, llaboral… Por eso se fala de violencies contra les muyeres, en plural. La visibilización del problema ye esencial y, nesti sen, ca caberu miércoles de mes la plataforma entamada por Andecha Ástur, Anticapitalistes, Amamantar, l’Asociación de Pensionistes de Xixón, l’Asociación Ecofeminista Petra Kelly d’Asturies, el Colectivu de Trabayadores, Feminismu en Llucha del CSI, la plataforma del Serviciu d’Ayuda a Domiciliu (SAD), Podemos y Verdes-Equo convoca una concentración delantre la Gota Llechi, en Xixón.
This work is licensed under a Creative Commons Attribution 4.0 International License.
