El ‘Principado’ lleva años repitiendo’l mesmu discursu: la despoblación ye’l gran problema del país. Pero cada vegada resulta más evidente que’l problema real nun ye que la xente marche, sinón el modelu territorial y económicu que ta consolidándose ensin alderique públicu nin correiciones de fondu.

Mientres se multipliquen los discursos sobre la necesidá de fixar población, reactivar el mediu rural y garantizar vivienda accesible, la realidá ye otra bien distinta: pueblos ensin servicios, viviendes vacíes que nun puen alquilase, precios xorreciendo nes zones urbanes y una descomanada presión del turismu y la especulación inmobiliaria.

En munchos conceyos asturianos, especialmente nel llitoral y nes árees más atractives pa la inversión turística, atopar una vivienda pa vivir tol añu ye cada vegada más difícil. Los pisos destínense a alquiler vacacional, segundes residencies o inversión especulativa, mientres mocedá, trabayadores y families ven imposible establecese nel territoriu. El resultáu ye un procesu silenciosu de espulsión social.

Les alministraciones falen de despoblación, pero eviten falar de regulación. Nun se ponen llímites efeutivos al alquiler turísticu, nun se moviliza la vivienda vacía a gran escala y nun se protexe de verdá el derechu a vivir nel propiu territoriu. La consecuencia ye clara: Asturies nun se vacía, Asturies espúlsase.

El contraste ye especialmente sangrante nel mediu rural. Hai pueblos enteros con decenes de cases zarraes, ensin opción de rehabilitación accesible, y ensin servicios pa los vecinos, mientres les persones que querríen seguir viviendo ellí  nun tienen posibilidaes económiques nin sociales de facelo. La burocracia, la falta d’inversión pública y l’ausencia d’una política clara de vivienda rural convierten cualisquier intención de repoblación nuna carrera d’obstáculos.

Falamos d’un problema estructural que nun se soluciona con campañes publicitaries nin con programes pilotu de curtia duración. Requier una decisión política clara: escoyer ente un modelu basáu na especulación, el turismu ensin llendes y el beneficiu a curtiu plazu, o un modelu que priorice la vida cotidiana, l’accesu a la vivienda y la permanencia de la población.

La pregunta ye incómoda, pero inevitable: ¿quier Asturies ser un territoriu pa vivir o un territoriu pa consumir?
Mientres nun se respuenda con fechos —y non con discursos—, la despoblación va siguir siendo’l síntoma visible d’un problema muncho más fondu.

This work is licensed under a Creative Commons Attribution 4.0 International License.