Les declaraciones del presidente del Gobiernu del ‘Principado’, Adrián Barbón, entes d’ayeri en FITUR, proclamando a Asturies como “potencia turística del norte”, nun son una anécdota nin un simple mensaxe promocional. Son la confirmación pública d’un cambéu de modelu asumíu, aceptáu y defendíu dende les instituciones: el pasu definitivu d’un país industrial a un territoriu resignáu a vivir del turismu.

Asturies foi, durante décades, una potencia industrial real, non un eslogan. Minería, siderurxa, metal, naval, enerxía: sectores que xeneraben emplegu estable, saber técnicu, población activa y cohesión social. Dende los años setenta, esi texíu foi desmantelándose sistemáticamente, primero cola reconversión, dempués col desdexamientu políticu, y finalmente cola renuncia esplícita a reconstruyir una base industrial sólida.

Frente a esa desindustrialización, nun se plantegó un modelu alternativu. Nun hebio planificación, nin estratexa de país, nin defensa real del emplegu productivu. Nel so llugar, el turismu foi convertíu nun sucedaneu, nuna coartada permanente pa xustificar la falta d’industria.

Güei, cuando se fala d’“industria turística”, convien dicilo claro: nun ye industria. Ye un sector estacional, precariu, dependiente del consumu esternu y con baxu valor amestáu. Nun xenera soberanía económica, nun fixa población, nun crea emplegu cualificáu nin sustituye la capacidá productiva perdida. Sirve pa maquillar estadístiques, non pa sostener un país.

Amás, la espansión turística tien costes que se silencien: presión sobre’l territoriu, degradación ambiental, especulación urbanística, encarecimientu de la vivienda y conversión del paisaxe y la cultura en mercancía. Asturies cuerre’l riesgu de ser tratada como reserva paisaxística, como parque temáticu pal visitante, mientres la población residente pierde industria, servicios y futuru.

Resulta especialmente grave qu’esti discursu triunfalista se faiga al mesmu tiempu que se sigue asistiendo a la pérda o debilitamientu de sectores industriales estratéxicos, ensin un plan creíble de reindustrialización, ensin una transición xusta y ensin una política enerxética y productiva propia. El turismu preséntase como ésiru mientres se normaliza’l fracasu industrial.

Asturies nun precisa más stands en FITUR nin más eslóganes bien diseñaos. Precisa industria, planificación económica, inversión productiva y trabayu estable. El turismu pue ser un complementu razonable; nun pue ser la base d’un modelu de país.

Porque’l problema nun ye nun ser una “potencia turística del norte”.
El problema ye aceptar ensin discusión pasar de potencia industrial a reserva turística.

This work is licensed under a Creative Commons Attribution 4.0 International License.