La universidá pública asturiana, nel centru del debate políticu pola entrada de centros privaos.

La entrada de universidaes privaes n’Asturies marca un puntu d’inflexón nel modelu universitariu del país. Per primer vegada, el Gobiernu del ‘Principado’, formáu por PSOE y Izquierda Unida, dio lluz verde a la implantación de centros universitarios privaos, franciendo con décades d’un sistema basáu esclusivamente na universidá pública.

La decisión ta formalmente tomada pol Executivu autonómicu y, polo tanto, ye responsabilidá del Gobiernu nel so conxuntu. Sicasí, Izquierda Unida, socia nel Gobiernu, manifestó públicamente la so oposición a la llegada d’estes universidaes, asegurando que la midida supón un riesgu pa la universidá pública y nun respuende a una planificación educativa seria.

Una vuelta más la posición ‘teórica’ d’IU entra en contradicción directa cola realidá política: IU forma parte del Gobiernu que permitió esta decisión. Dicir que se ta escontra una política que se permite dende’l propiu Executivu nun ye oposición; ye, como muncho, una forma d’evitar asumir responsabilidaes. Gobernar implica corresponsabilidá, y nesti casu la lluz verde a la universidá privada nun se dio escontra’l Gobiernu, sinón dende’l Gobiernu.

La discusión nun ye solo sobro universidaes privaes sí o non. Ye sobro qué modelu d’educación superior se quier p’Asturies y quién toma les decisiones estratéxiques. Nun contestu de cayida demográfica, con una universidá pública que precisa más sofitu institucional pa complear facultaes que falten y aumentar places ellí onde hai demanda –rama sanitaria por exemplu-, la entrada de centros privaos abre interrogantes llexítimos sobro planificación, equidá y prioridaes polítiques.

Pero’l problema ye entá más fondu. Asturies sigue ensin capacidá política real pa decidir el so modelu universitariu con soberanía. La dependencia normativa, financiera y estratéxica del Estáu condiciona cualisquier política educativa propia. Mientres nun se disponga de poder políticu, les decisiones sobre educación superior van siguir viniendo marcaes dende Madrid, y n’Asturies namás vamos poder xestionar marcos impuestos.

La universidá nun ye un serviciu más: ye una ferramienta clave pa la construcción d’un país con criteriu propiu, conocimientu y futuru. Defender la universidá pública nun ye compatible con permitir la entrada de modelos privaos ensin un debate social real y ensin asumir les consecuencies polítiques de les decisiones tomaes.

Si IU quier tar escontra de la universidá privada, tien que demostralo coles sos decisiones de gobiernu, non solo coles sos declaraciones. Y si Asturies quier un sistema universitariu al serviciu del país, primero tien que resolver una cuestión previa: quién decide realmente sobre la so educación y con qué poder.

Mientres eso nun se afronte con claridá, la universidá —pública o privada— va siguir siendo un síntoma más d’un problema estructural: la falta de soberanía política real pa decidir el futuru d’Asturies.

This work is licensed under a Creative Commons Attribution 4.0 International License.