Cartelu de Pica Pica Hack
Nel primer cuatrimestre de 2026, Pica Pica HackLab (PicaHack) pon en marcha un programa de talleres d’iniciación a la informática llibre, dirixíu a persones con pocos conocimientos previos pero interesaes nes implicaciones étices, sociales y ambientales de les tecnoloxíes de la información.
El movimientu de la informática llibre defende que tanto el software (programes y aplicaciones informátiques) como el hardware (loscomponentes físicos de los ordenadores) han poder usase, modificase y compartise llibremente por cualesquier persona, ensin restricciones téuniques, llexales o económiques. Estes llibertaes estiéndense tamién a la información, que tien de tar disponible en condiciones d’igualdá.
Estos principios resulten fundamentales non solo pal desenvolvimientu individual, sinón tamién pal bien común. Nun contestu nel que les actividaes cotidianes dependen cada vez más de ferramientes dixitales, la informática llibre y l’accesu llibre al conocimientu conviértense nuna parte esencial del exerciciu de los derechos y llibertaes fundamentales.
Los talleres y cursos van desarrollase de manera regular los martes de 19:00 a 20:30 hores, nel espaciu El Olivar (Cai Oscura, númberu 1/3, n’Uviéu, Asturies).
A lo llargo del cuatrimestre van combinase distintos formatos, alternándose selmanalmente un Cursu d’introducción a la llinia de comandos y a la programación útil, concebíu como cursu estendíu nel tiempu, con sesiones el primer y tercer martes de cada mes, un Cursu d’introducción a la reparación electrónica, tamién como cursu estendíu, con sesiones el segundu y cuartu martes de cada mes. y Talleres breves d’una sola sesión, de temática variada, que van realizase’l quintu martes de mes o, si’l mes anterior tuvo namái cuatro selmanes, el primer martes del mes siguiente.
PicaHack dispón d’ordenadores pa prestar a les persones asistentes que lo precisen, bien porque nun traigan equipu propiu o porque prefieran trabayar col material disponible nel local.
La asistencia ye llibre y de baldre. En casu de superase l’aforu del local, l’entrada va facese por orde d’arribada, sacante nos cursos estendíos, onde se va dar prioridá a les persones que yá asistieren a sesiones previes.
Anque la actividá ye gratuita, quien lo deseye pue facer una aportación voluntaria nuna hucha habilitada pa ello. Tamién se acepten donaciones de componentes y equipos informáticos o de telecomunicaciones, siempre que cumplan unos mínimos d’utilidá pa evitar l’acumulación de material innecesariu.
Como actividá de difusión, namái se va usar, promocionar y dar sofitu a software llibre.
This work is licensed under a Creative Commons Attribution 4.0 International License.
