Decenes de pancartes con llemes antifacistes apaecieron nos últimos díes en distintos puntos d’Asturies, dende barrios y espacios urbanos hasta enclaves simbólicos como la Universidá Llaboral o de conteníu revindicativu comu bancos. La campaña quier alertar especialmente a la mocedá de que’l facismu nun ye antisistema y que siempres actúa al serviciu del capitalismu.

Los bancos foron un de los oxetivos d’esta campaña

Bancos, marquesines, quioscos de música, cais de barrios y otros espacios públicos convertiéronse n’escenarios visibles d’una acción coordinada qu’enllena’l territoriu de mensaxes direutos y ensin ambigüedá. Pancartes con llemes como «Nativa o estranxera, la mesma clase obrera», «Faches, llambeculos de los ricos», «Ser nazi ye una mierda» o’l ya clásicu «Fuera fascistes de los nuesos barrios» apaecen repartíes por distintos puntos d’Asturies.

Anque les frases varíen, la idega de fondu ye común: desarmar el discursu que presenta al fascismu como una opción rebelde o antisistema. Dende esta iniciativa incídese en que’l fascismu, lloñe de cuestionar l’orde establecíu, funciona históricamente como un instrumentu pa protexer los intereses del capital cuando la democracia resulta insuficiente pa garantizalos.

Según esplica Asturies Insumisa, que se fexo ecu de la campaña nes sos redes, el facismu apaez como aliáu del sistema capitalista nes etapes de crisis o conflictu social, convirtiéndose nuna ferramienta pa frenar avances en derechos y llibertaes. “El facismu nun ataca al capitalismu, sinón que se pon al so serviciu pa contener y reprimir a les clases trabayadores y populares”, señalen dende esti colectivu.

La campaña tien tamién una clara vocación pedagóxica. L’oxetivu principal ye facer llegar esti mensaxe a la mocedá, un sector especialmente espuestu a discursos simplificadores y a la normalización de la ultradrecha en redes sociales y espacios públicos. Les pancartes busquen, asina, recuperar la cai como espaciu de debate y contestación social.

Col espardimientu d’estes mensaxes per tol país, los colectivos antifacistes reivindiquen la necesidá de nun tolerar la presencia del fascismu nos barrios y de siguir defendiendo valores d’igualdá, solidaridá y xusticia social frente a discursos d’odiu y esclusión.

Llucía F. Marqués

This work is licensed under a Creative Commons Attribution 4.0 International License.