Un total de 17 comisiones de fiestes de barrios y parroquies de Xixón decidieron dar un pasu alantre y organizarse nuna federación común cola mira puesta na defensa del modelu tradicional de festexos populares, “de la xente, pa la xente”
Fiestes de barriu
La nueva entidá, que lleva por nome Vive lo que sentimos, quedó formalmente constituyida nuna xunta celebrada en Deva y naz col oxetivu principal de reforzar el protagonismu del vecindariu na organización de les fiestes.
Les comisiones que formen parte de la federación proceden de puntos diversos del conceyu, dende parroquies rurales hasta barrios urbanos, y comparten un mesmu esmolecimientu: la perda progresiva de control vecinal sobre unos festexos que, según denuncien, nos últimos años fueron quedando cada vegada más en manes d’empreses privaes. Frente a esti procesu, la federación apuesta por recuperar un modelu basáu na participación directa, la colaboración ente vecinos y el respetu a les tradiciones de cada llugar.
La iniciativa empezó a xestase na primavera, a partir d’un manifiestu difundíu en redes sociales pola comisión de fiestes de Deva, que conectó de manera inesperada con otros colectivos festivos del conceyu. Esa respuesta compartida sirvió pa constatar qu’esistía un sentimientu común y pa dar llugar a una primer xunta en xunu, que marcó l’entamu d’un procesu de contautos y trabayu conxuntu que desembocó agora na creación de la federación.
Dende Vive lo que sentimos defiéndese que les fiestes populares son, ante too, un espaciu d’identidá y convivencia, y que nun pueden convertise nun productu estandarizáu. Los sos representantes insisten en que la diversidá, la palabra compartida y la implicación vecinal son la base de unos festexos que quieren caltener vivos y reconocibles.
Amás de la reivindicación cultural, la federación naz tamién con una clara vocación práctica. Dende la so constitución yá empezaron a trabayar sobre la normativa municipal que regula les fiestes, reclamando una interlocución directa col Ayuntamientu, mayor claridá nos procedimientos administrativos y la estabilidá de les normes d’un añu pa otru. L’oxetivu, señalen, ye cumplir la llegalidá ensin que los trámites se conviertan nun frenu pa la organización vecinal.
Otra de les preocupaciones que comparte la federación ye la necesidá d’asegurar el relevu xeneracional nes comisiones de fiestes, pa evitar que la falta de voluntarios termine por facer desapaecer celebraciones con décades d’historia. Nesti sen, la unión ente colectivos vese como una ferramienta pa compartir esperiencies, sofitu y conocencia.
La creación de Vive lo que sentimos llega nun momentu d’alderique abiertu alredor del futuru de los festexos populares, col sector priváu amosando un creciente interés nesti ámbitu. Frente a ello, les comisiones revindiquen un modelu de fiestes con raigañu, onde la cultura popular nun se vea diluyida nin convertida nuna fórmula uniforme. La federación quier presentase, asina, como un espaciu de suma y defensa del patrimoniu festivo tradicional del conceyu.
Llucía F. Marqués
This work is licensed under a Creative Commons Attribution 4.0 International License.
