L’ambulancia nun pudo aportar a tiempu
El pasáu 15 de xineru producióse nel Aeropuertu d’Asturies un fechu que volvió poner enriba la mesa les carencies estructurales del nuesu país. Un pasaxeru d’un vuelu internacional que tuvo que facer un aterrizaxe d’emerxencia perdió la vida depués de recibir atención médica nel mesmu aeródromu. Nel momentu del sucesu l’aeropuertu nun disponía d’una ambulancia permanente pa atender urxencies.
Dende hai meses, la principal puerta d’entrada aérea a Asturies nun tien un serviciu sanitariu fixu. Cuando se produz una incidencia grave, l’asistencia tien que desplazase dende otros puntos, con retrasos que nestos casos pueden resultar decisivos. Sindicatos, profesionales y parte de la clase política lleven tiempu reclamando que se recupere esti recursu básicu, pero hasta agora les demandes cayeron en sacu rotu. El resultáu ye una sensación d’abandonu que cuesta entender nun equipamientu que mueve miles de pasaxeros cada añu.
Esti episodiu ye más qu’un casu aislláu: ye’l reflexu d’un problema de fondu. Dende les instituciones repítese una y otra vegada que’l futuru d’Asturies pasa por apostar decididamente pol turismu. Fálase de récords de visitantes, de promoción esterior y de convertir el país nun destín de referencia. Pero ¿qué tipu d’apuesta ye esa si nun se garanticen primero les condiciones mínimes pa recibir a la xente?
Les carencies nun se llenden al aeropuertu. Llegar a Asturies pela carretera ye, en munchos casos, una aventura cara y complicada. La AP-66 sigue siendo una de les peaxes más cares del Estáu, con precios que desanimen a visitantes y a la mesma ciudadanía. Cortes, obres y retenciones repítense ensin que se tomen midíes reales pa facer d’esa vía una entrada digna y accesible. Ye difícil falar de potenciar el turismu cuando entrar nel país supón pagar un peaxe descomanáu.
Nel ámbitu aéreu la situación tampoco ye meyor. Falten vuelos, conexones estables y frecuencies abondes. L’Aeropuertu d’Asturies funciona mui per debaxo de les sos posibilidaes y ensin una estratexa clara a llargu plazu. Y, como quedó demostráu col casu recién, nin siquiera se cubren los servicios básicos d’emerxencia que deberíen tar garantizaos de forma incuestionable.
A too esto súmase la realidá de la sanidá pública asturiana, cada vez más tensionada. Les fuelgues del personal médicu, les llistes d’espera y la falta de profesionales amuesen un sistema que ta llegando al llímite. Si l’atención sanitaria falla nel día a día de la población, ¿cómo se pue pretender atender con garantíes a miles de visitantes? El casu del aeropuertu ye namás la punta del iceberg d’una precariedá que s’estiende per tol territoriu.
Asturies nun pue permitise vender al mundu una imaxe moderna y acoyedora mientres les sos infracadarmes básiques faen agües. Apostar too al turismu ensin iguar primero les infracadarmes de receición de viaxeros y ensin garantizar una sanidá pública a l’altor ye un camín equivocáu. Lo que pasó nel aeropuertu debería servir d’avisu: enantes de suañar con más visitantes, hai que curiar meyor a los que yá tán equí.
Llucía F. M
This work is licensed under a Creative Commons Attribution 4.0 International License.
