Tres del incendiu

Andecha Astur fexo públicu’l so sofitu a la denuncia presentada polos colectivos ecoloxistes d’Asturies, y de manera especial pola Coordinadora Ecoloxista d’Asturies, pola política de repoblación forestal que se ta llevando a cabu en montes públicos del conceyu de Tinéu. La organización nacionaliega alerta del usu d’especies de coníferes foránies, ayenes a los ecosistemes propios del país y con un altu comportamientu pirolíticu, n’espacios naturales de gran valor ambiental y social.

Según señalen, montes como La Cabada, L.laguero, Siel.la o Cobertoria, afeutaos por incendios forestales, tán siendo repoblaos con especies como’l pinu mariellu (Pinus taeda) o’l cedru xaponés (Cryptomeria japonica). Trátase, recuerden, d’árboles d’orixe foriatu, escoyíos con criterios productivistes y de crecedera rápida, pero inaceutables dende’l puntu de vista ecolóxicu y de la prevención d’incendios.

Andecha Astur califica esta estratexa forestal, impulsada dende la Conseyería de Mediu Rural y Política Agraria del Principado, como un pasu atrás grave na protección del mediu natural asturianu. A xuiciu del colectivu, nun se pue falar de recuperación de montes quemaos cuando se sustitúin ecosistemes diversos por llantaciones monoespecífiques, empobrecíes y altamente vulnerables al fueu, que repiten errores yá conocidos n’otros territorios.

La organización recuerda que les coníferes foránies emplegaes incrementen de manera significativa’l riesgu d’incendiu pola so elevada inflamabilidá y pola acumulación de biomasa seca; emprobecen el suelu y dificulten la rexeneración natural d’especies autóctones; afayen mal cola fauna llocal, al nun xenerar hábitats diversos, y inhiben la biodiversidá, creando montes artificiosos ensin resiliencia frente al cambéu climáticu.

Especialmente grave resulta, según denuncien, que estes actuaciones nun cuenten con informes públicos d’impautu ambiental nin con procesos de participación social o consulta a colectivos ecoloxistes, xente del monte o comunidaes rurales afeutaes. Amás, recuerden que’l Plan Forestal del Principado d’Asturies vixente nun contempla l’usu d’estes especies foránies, polo que consideren que se ta ante una actuación cuestionable dende’l puntu de vista llegal y de planificación.

Dende Andecha Astur sorrayen que la defensa de los montes nun ye namás una cuestión ambiental, sinón tamién de soberanía, xusticia territorial y dignidá rural. Nel so comunicáu, critiquen que los montes d’Asturies sigan siendo trataos como espacios d’esperimentación forestal al serviciu d’intereses empresariales o productivistes, despreciando’l conocimientu tradicional y científicu acumuláu nel país.

Por too ello, la organización esixe la paralización inmediata de les repoblaciones con coníferes foránies en montes públicos de Tinéu y del restu d’Asturies; la revisión integral de los planes de repoblación con criterios científicos y ecolóxicos adaptaos al cambéu climáticu; la prioridá pa la rexeneración natural y la llantación d’especies autóctones como carbayos, castañales, bidules o fayes; la participación real de la sociedá civil y de les comunidaes rurales na planificación forestal, y el cumplimientu estricto y l’actualización democrática del Plan Forestal d’Asturies.

“Asturies precisa montes vivos, non plantaciones industriales”, conclúin dende Andecha Astur, defendiendo polítiques forestales que protexan la biodiversidá, amenorguen el riesgu d’incendios y xeneren futuru pal mediu rural. Los montes d’Asturies, recuerden, son patrimoniu común del pueblu asturianu, y defendelos ye defender el futuru del país.