Entrada d’urxencies en Les Arriondes
En plenu apoxeu de lo que se considera la peor fola de gripe de los caberos años, diverses informaciones recoyíes por esti mediu apunten a la posible aplicación n’Asturies de criterios asistenciales asemeyaos a los del denomáu “Protocolu Ayuso”, venceyáu a la xestión sanitaria de la pandemia en Madrid baxo’l gobiernu de Isabel Díaz Ayuso. Estes sospeches abren serios interrogantes sobre la intencionalidá y la correición na respuesta del sistema sanitariu ante la actual crisis epidémica.
Según los datos apurríos, dellos profesionales sanitarios podríen tar recibiendo instrucciones concretes pa evitar l’hospitalización de persones afectaes pola gripe, mesmo en situaciones de grave deterioru del so estáu de salú. Rexístrense casos de pacientes que, tres d’acudir a servicios d’urgencies con sintomatoloxía severa, fueron unviaos de vuelta a los sos domicilios ensin ser ingresaos nin sometíos a les pruebes diagnóstiques pertinentes.
Ente los episodios más graves destaca’l d’una persona nonaxenaria que, tres acudir a urgencies, foi mandada pa casa en plenu temporal de ñeve la nueche de Reis, ensin medios de tresporte que garantizaren el so regresu en condiciones de seguridá. Tamién se documenta’l casu d’otra muyer, vecina del occidente asturianu, que finó dempués de ser atendida en urgencies y unviada de vuelta al so domiciliu ensin que se-y practicaren les pruebes clíniques necesaries.
A estes situaciones súmense otres práutiques que xeneren alarma. Hai constancia de ingresos en planta de pacientes compartiendo habitación ensin que se disponga entá del resultáu de les PCR pa gripe o covid, col riesgu evidente de contaxu nel casu de resultar positivu dalgún de los ingresos.
L’acumulación d’estes irregularidaes ta provocando una fonda preocupación social y profesional, y reabre’l debate sobre la necesidá de tresparencia, criterios clínicos claros y prioridá absoluta del derechu a una atención sanitaria digna, especialmente nos momentos de mayor presión asistencial.
Llucía F. Marqués
This work is licensed under a Creative Commons Attribution 4.0 International License.
