La organización nacionaliega afala al presidente a dexar de facer xestos grandilocuentes y discursos vacios pa ponese d’una bones a facer daqué pa solucionar el problema con actuaciones concretes
Andecha Astur volvió a cargar con dureza contra la situación del peaxe de la Autopista del Güerna (AP-66), al que califica d’“ofensa permanente” p’Asturies. La organización nacionaliega denuncia que sigue cobrándose un peaxe que considera abusivu y heriedu d’una prórroga illegal, nun momentu nel que la infraestructura ta sometida a obres constantes, con retrasos, cortes y una perda evidente de calidá del serviciu.
Nel comunicáu fechu públicu esti selmana, Andecha Astur señala que la situación afecta non solo a los usuarios avezaos de la vía, sinón tamién al tresporte profesional y al conxuntu de la economía asturiana. Al so xuiciu, pagar esti peaxe nes actuales condiciones supón un perxuiciu direutu pa la ciudadanía.
La formación critica especialmente l’actuación del Gobiernu del ‘Principado’ y del so presidente, Adrián Barbón. Según Andecha Astur, l’Executivu autonómicu lleva selmanes acumulando “grandes declaraciones mediátiques” ensin que se concreten en midíes reales. “Asturies nun necesita más titulares, necesita aición política inmediata”, afirma la organización, qu’identifica como problema de fondu la prórroga de la concesión aprobada dende Madrid. Sicasí, apunta tamién al papel d’AUCALSA, empresa concesionaria de la AP-66, a la que acusa de beneficiase de la situación y d’imponer tarifes elevaes por un serviciu que, aseguren, nun ta prestándose con garanties mínimes de calidá, fluidez nin compensación al usuariu.
Amás, la organización denuncia lo que califica como “servilismu” del ‘Principado’, al entender que la Alministración asturiana dispón de ferramientes llexales pa actuar y nun les ta utilizando, llindándose a un discursu que consideran vacíu.
Nel so comunicáu, Andecha Astur reclama que’l Gobiernu del ‘Principado’ entame de manera urxente un recursu contenciosu-alministrativu escontra’l Gobiernu español pa declarar nula la prórroga del peaxe, por vulneración de la normativa de competencia y tresparencia. Tamién solicita la suspensión cautelar del cobru del peaxe mientres se resuelve la situación llegal de la concesión y mientres la autopista siga en obres.
Otra de les demandes ye la convocatoria d’una Comisión d’emerxencia institucional y social n’Asturies, con participación de conceyos, sindicatos, empresariado y plataformes cíviques, col oxetivu de definir una estratexa común en defensa de la movilidá y de la economía asturiana. Andecha Astur pide tamién mayor presión institucional en Madrid, al traviés d’iniciatives parlamentaries que busquen la reversión de la vía a titularidá pública ensin peaxe.
Respecto a AUCALSA, la organización esixe que’l ‘Principado’ abra un espediente sancionador inmediatu polos incumplimientos de calidá del serviciu y pola posible vulneración de los drechos de los consumidores. Reclama, amás, la devolución o compensación del peaxe a les persones afectaes polos retrasos y cortes, asina como la imposición de bonificaciones del 100 % nos tramos en obres o con retenciones graves.
Andecha Astur tamién propón auditoríes téuniques independientes sobre la seguridá y la fluidez de la vía, la creación d’un sistema d’información en tiempu real controláu pola Alministración y una auditoría completa de les cuentes y beneficios de la concesión, pa determinar el nivel real d’abusu económicu.
Nel comunicáu, la organización conclúi que, anque Madrid seya quien sostién la prórroga, AUCALSA ye quien caltién la barrera del peaxe día tres día, y el ‘Principado’ quien permite la situación cola so inacción. Poro, Andecha Astur considera inaceptable siguir aplazando decisiones y reclama poner fin a lo que califica como parálisis institucional y empresarial.
“Col peaxe del Güerna, ye’l momentu de pasar de les pallabres a los fechos”, resume la organización.
Llucía F. Marqués
This work is licensed under a Creative Commons Attribution 4.0 International License.
