Los bolos asturianos presllaron 2025 con un nivel de xuegu sobresaliente nes categoríes individuales y por peñes, consolidando referentes como Sergio de la Peña “El Castillo” y reforzando la presencia territorial del esporte.
La temporada 2025 de bolos asturianos volvió a demostrar la puxanza d’un deporte tradicional que, amás de competición, ye padremuñu vivu de la cultura asturiana. Nun añu marcáu pola emoción nes boleres, los torneos individuales y por peñes dexaron momentos pa la historia y consolidaron el sofitu d’una afición fiel. La campaña combinó competición, tradición y divulgación, con cites veteranes como’l campionatu de veteranos en Póo y xornades de reflexón sobre’l futuru de los esportes tradicionales, cola mirada puesta nel relevu xeneracional y na ampliación de la base social bolística
Nel Campionatu d’Asturies de Primera Categoría Individual, el protagonismu recayó en Sergio de la Peña, conocíu nel circuitu como ‘El Castillo’. El xugador encabezó la clasificación con 2.270 tantos n’ún compautu de 9 boles, superando con autoridá a los sos principales rivales. La segunda plaza foi pa Javito, que sumó 2.224 tantos, ente que Pelayo de la Peña, ‘El Troncu’, ocupó’l tercer llugar con 2.195 puntos. Héctor rozó’l podiu con 2.192 tantos, nuna llucha mui axustada polos puestos d’honor. Les cifres, recoyíes pola Federación Asturiana de Bolos, confirmen el gran nivel d’una categoría cimera que nun dio tregua.
La campaña competitiva incluyó tamién el Campionatu d’Asturies d’Aficionaos, con una participación notable de xugadores y peñes de distintes comarques. L’actividá’ rexistró enfrentamientos disputaos que sirvieron d’escaparate pa los nuevos talentos y pa dar fortaleza al movimientu bolísticu na base del deporte.
El 26 y 27 de xunetu, la bolera de Póo, en Llanes, acoyó una nueva edición del Campionatu d’Asturies de Veteranos. La cita volvió a convertir la contienda nuna fiesta de convivencia y precisión, con reconocencia pública al enfotu de los participantes d’una categoría que caltién la tradición y sigue a xenerar referentes dientro del mundu bolísticu asturianu.
Nel capítulu de promoción y reflexón, la xornada La Xuntanza, celebrada en Lugo de Llanera, xuntó a especialistes, federaciones y clubes p’aldericar sobre’l futuru de los esportes tradicionales na cornisa cantábrica. Les meses redondes analizaron la salú actual de los bolos y la necesidá de dar puxu a proyeutos que garanticen el relevu xeneracional. Pela tarde, l’actividá desplazóse al Centru d’esporte de La Morgal, onde se fixo una demostración abierta de bolos y otros xuegos tradicionales, reforzando’l calter identitariu y divulgativu del deporte.
El balance xeneral de 2025 ye’l d’una temporada completa: altu nivel competitivo, presencia territorial y un esfuerzu constante por ampliar la base social del deporte. Federación, peñes y entidaes siguieron trabayando pa que los bolos sigan siendo espaciu de normalidá, tradición y futuru n’Asturies.
Nel Dos Santos
This work is licensed under a Creative Commons Attribution 4.0 International License.
