L’Asociación Iniciativa pol Asturianu activó esti miércoles el plazu de matrícula pa un nuevu cursu de llingua asturiana en nivel inicial, que va desendolcáse dafechu en llinia. Les inscripciones van poder formalizase dende’l 7 hasta’l 22 de xineru, dos selmanes nes que la entidá abre’l procesu tanto pa persones socies como pa nuevu alumnáu que quiera sumase a la formación.

El cursu, que va entamar el 27 de xineru y va prolongase hasta’l 9 d’abril, va tener una duración d’once selmanes y un cómputu total de 50 hores llectives. La metodoloxía combina’l acompañamientu del tutoráu con periodos de trabayu autónomu, pa favorecer la organización personal del alumnáu y permitir que les actividaes se faigan con flexibilidá y s’afayen al ritmu de cada participante. La formación, que se canaliza per una plataforma dixital específica, inclúi sesiones de tutoría a distancia de calter obligatoriu, xunto a xeres individuales y actividaes complementaries diseñaes pol equipu docente.

Al remate del cursu, l’alumnáu va enfrentase a una prueba final que determinará la superación del nivel. Quienes la superen van recibir una certificación oficial emitida pola Academia de la Llingua Asturiana, que val pa acreditar la formación recibida y constatar los conocimientos básicos de la llingua.

La matrícula xeneral tien un coste de 75 euros, anque les persones socies van poder beneficiase d’una tarifa amenorgada de 60 euros. La propia asociación esplica que ye posible asociase nel mesmu procesu de matrícula pa poder aplicar esti descuentu dende’l primer momentu. Iniciativa pol Asturianu recuerda que’l cursu ta dirixíu, principalmente, a persones que nun tuvieron contautu previu cola llingua o que parten d’un nivel de conocencia mui básicu, siendo una opción perbona pa xente que recién aporta a Asturies a vivir o que ta pensando en facelo.

Pa consultes o más detalles, les persones interesaes pueden llamar al teléfonu de contautu facilitáu pola asociación –650 064 171- y falar direutamente con Arantza Margolles, presidenta de la entidá. Iniciativa pol Asturianu tamién tien disponibles na so plataforma web el formulariu d’inscripción y la información completa sobre les condiciones del cursu.

Susana Sela

This work is licensed under a Creative Commons Attribution 4.0 International License.