El serviciu d’emerxencies n’Asturies vive un empioramientu operativu y social en plenu iviernu. El Sindicatu Asturianu La Clase Trabayadora (LCT) fixo pública la so esmolición pola salida de 40 bomberos-conductores del SEPA, una mengua d’efectivos que, según l’organización, agrava les dificultaes del sistema de respuesta ante siniestros.
El venceyu llaboral d’estos profesionales remató’l 4 d’avientu de 2025, depués del final de los sos contratos temporales que’n teoría diben ser renovaos. LCT atribúi’l problema a la falta d’aprobación, en plazu, de la Relación de Puestos de Trabayu (RPT), un instrumentu clave pa la ordenación de plantilles públiques. Esta demora administrativa, xunida a la falta de previsión nel procesu de regularización de places, derivó nel cesamentu del personal ensin nomamientu de reemplazu, dexando un vacíu d’efectivos en dellos parques de bomberos. La mala xestión del SEPA derivó tamién na renuncia al puestu d’otros doce bomberos qu’abandonaron el puestu pa incorporase a otros servicios, buscando una estabilidá que’l Principado nun yos da, colo que aparte de los puestos que quedaron vacios pola fin de la contratación temporal ta dándose una perda de personal cualificáu por desconfianza nel serviciu.
La salida produzse nun momentu especialmente sensible pal serviciu: el mes d’avientu concentra tradicionalmente un altu volume d’intervenciones, coincidendo col periodu de permisos y descansos reglamentarios, amás del repunte d’incidencies venceyaes al mal tiempu y a los desplazamientos d’esta dómina del añu. Pa LCT, la combinación d’estos factores reduz la capacidá de movilización d’equipos completos y pue afectar direutamente a la seguridá de la población.
El sindicatu recuerda que’l SEPA opera nun territoriu con orografía complexa y dispersión poblacional, onde’l tiempu de respuesta y la disponibilidá d’efectivos son determinantes. La mengua de personal formáu y esperimentáu, alerta LCT, incrementa’l nivel de vulnerabilidá ante incendios, accidentes viarios, rescates en mediu natural y episodios meteorolóxicos adversos.
Frente a esti escenariu, LCT reclama midíes urxentes pa tres árees: la aprobación inmediata de la RPT, el refuerzu estable de la plantilla y la búsqueda de soluciones que permitan recuperar el personal o evitar nueves salíes ensin recambiu. L’organización anuncia qu’impulsará l’alderique públicu pa visibilizar la situación y revindicar la protección d’un serviciu qu’consideren esencial pa garantizar la seguridá y la cobertura d’emerxencies en tol país.
Llucía F. Marqués
This work is licensed under a Creative Commons Attribution 4.0 International License.
