L’asociación Iniciativa pol Asturianu abre esti llunes, 5 de xineru, el procesu de votación ciudadana pa escoyer la ‘Meyor Noticia pal Asturianu en 2025’, una campaña que quier destacar l’actualidá más relevante pal idioma a lo llargo l’añu pasáu.
Les votaciones entamaron esti vienres 2 de xineru y van tar abiertes hasta’l sábadu 10 de xineru, dando a la ciudadanía un plazu d’ocho díes pa participar na escoyeta online. Cola iniciativa, la organización quier facer visible “el bon momentu informativu del asturianu en 2025 y dar protagonismu a los avances sociales y mediáticos que contribúin a la normalización del idioma”.
La presidenta de la entidá, Arantza Margolles, desplicó’l sentíu d’esti proyeutu, que nació en 2013 y cumple agora 13 años d’actividá, como una fórmula pa “mirar p’atrás, celebrar lo llograo y tomar puxu pal futuru”. Según señaló: “Tamos mui contentes de poder volver entamar esta campaña, porque mos permite revisar y compartir les munches bones noticies qu’hubo pa la llingua. Ye un exerciciu colectivu d’arguyu y, sobre manera, d’enerxía pa siguir trabayando”.
Les persones participantes van poder escoyer ente 10 noticies finalistes, seleicionaes d’un conxuntu inicial de 22 informaciones positives sobro la presencia y los avances del asturianu. Les propuestes inclúin temes de diferente tipu: dende llogros institucionales y educativos hasta la repercusión mediática del idioma en prensa, radio y televisión.
Pa incentivar la participación, Iniciativa pol Asturianu anuncia un sorteu d’un llote de llibros en llingua asturiana, nel que van entrar automáticamente toles persones que voten. L’alcuentru ente activismu, divulgación y premiu cultural refuerza’l calter popular de la campaña y la vocación de difusión del patrimoniu llingüísticu
Susana Sela
This work is licensed under a Creative Commons Attribution 4.0 International License.
