El mercáu residencial en Asturies peslló 2025 con una escalada interanual del 12,5% nel preciu mediu de la vivienda -14’4% en Xixón-, situando al país como’l cuartu territoriu del Estáu onde más se dispararon los precios, namás per detrás de Madrid, Comunidá Valenciana y les Islles Baleares.

Les cifres, asoleyaes pola tasadora Tinsa, debuxen un ciclu de revalorización que nun tien precedente dende la crisis que punxo fin al boom especulativu de 2007.

El cuartu trimestre del añu confirmó’l calter xeneralizáu del encarecimientu, con especial incidencia nes ciudaes. En Xixón, los precios de los pisos aumentaron el 14,4%; n’Avilés, el 12,8%, y n’Uviéu, el 11,6%. La tendencia marca un cambéu bruscu con respectu a los caberos años, cuando’l valor de la vivienda n’Asturies se movía nuna forqueta relativamente estable y alloñada de les tensiones actuales.

L’encarecimientu nun ye solo una magnitú económica. Ye’l telón de fondu d’un procesu que ta tresformando Asturies: mocedá que retrasen la emancipación o marchen a otros países pa poder entamar la so vida, families que ven desapaecer la so capacidá d’aforru y barrios que pierden residentes propios a midida que la vivienda se convierte en activu d’inversión o bien d’usu turísticu. L’alderique social que s’abre nun ye nuevu, pero sí más urxente: la vivienda, como drechu, colisiona ca vegada con más fuercia cola vivienda como negociu.

Nel Dos Santos

This work is licensed under a Creative Commons Attribution 4.0 International License.