La Plaza’l Parchís de Xixón foi ayer escenariu d’una concentración na que cientos de persones espresaron la so refuga frontal al ataque militar de d’Estaos Xuníos contra Venezuela, una agresión que dende la protesta se calificó ensin matices como illegal, imperialista y contraria al drechu internacional. La movilización convirtióse nun espaciu de denuncia contra una escalada bélica que vuelve poner en peligru la paz y la soberanía de los pueblos
Convocada por colectivos solidarios y organizaciones sindicales, ente elles CCOO d’Asturies, la protesta cuntó con una presencia destacada de persones de la comunidá venezolana residente n’Asturies y d’activistes pacifistes. Nes intervenciones señalóse direutamente a la Alministración de Donald Trump como responsable d’una política esterior basada na menacia la fuercia militar y el despreciu sistemáticu poles normes que rixen les relaciones ente estaos.
Baxo pancartes con mensaxes nidios contra la agresión imperialista, denuncióse que l’ataque vulnera los principios básicos recoyíos na Carta de les Naciones Xuníes y confirma una estratexa d’inxerencia que se repite ca vegada que los intereses de Washington asina lo requieren. Dende la concentración afirmóse que nun hai defensa posible d’esta operación dende’l puntu de vista xurídicu nin éticu, y que la retórica sobre la democracia nun ye más qu’un pretextu.
Los participantes fixeron fincapié en que la ofensiva militar ta fondamente venceyada a intereses económicos y xeoestratéxicos, especialmente al control de recursos naturales y a la presión de grandes corporaciones y fondos financieros. La guerra, recordaron, nun ye de baldre: xenera beneficios pa unos pocos mentanto multiplica’l sufrimientu de la población civil, convertida en moneda de cambéu nes disputes del poder global.
Dende Xixón denuncióse tamién que les polítiques esteriores de Trump suponen un pasu más na normalización de la violencia como ferramienta política, reforzando un modelu imperialista que dende fai décades vien causando destrucción, inestabilidá y muerte en distintes rexones del mundu. La protesta quixo dexar claro que nun se trata d’un conflictu llonxanu, sinón d’un ataque que tien implicaciones direutes pal orde internacional y pa los drechos de los pueblos.
La concentración preslló con un llamamientu firme a la comunidá internacional y a la Xunión Europea pa que defendan ensin ambigüedaes el diálogu, el drechu internacional y la soberanía de Venezuela, y pa que rompan cola complicidá silenciosa frente a les agresiones militares. Dende Asturies llanzóse un mensaxe inequívocu: non a la guerra, non a l’imperialismu y refuga total a la inxerencia de d’Estaos Xuníos.
Llucía F. Marqués
This work is licensed under a Creative Commons Attribution 4.0 International License.
