Hostelería con Conciencia alerta:
«Queremos avisar: tamos viendo la repetición d’una traxedia. Va unos años asistimos a la desapaición del pequeñu comerciu de barriu, devoráu poles grandes superficies, los alquileres abusivos y l’abandonu institucional. El siguiente na llista d’estinción ye’l chigre de barriu».

Va unos díes, les páxines del decanu de la prensa asturiana recoyíen l’entusiasmu de la patronal hostelera de Xixón y de dellos sectores institucionales. Según ellos, avientu foi un mes perbonu pa la hostelería. Sicasí, dende Hostelería con Conciencia vémonos obligaos a dicir alto y claro que la situación nun ye como se pinta. Resulta insultante dibuxar un escenariu d’allegría y ésitu cuando la realidá de quien ta tres la barra ye una llucha diaria pola supervivencia.

Entrugámonos d’ónde saquen esos datos. Quiciabes de los grandes hoteles o de dellos locales del centru, pilares indispensables del turismu xixonés. Pero la hostelería de verdá, la de los barrios, ta viviendo una realidá paralela. Nun se pue dicir que «va too bien» cuando lo ingresao n’esos cuatro díes de folixa va íntegramente —y ensin pasar pela casina de salida— a cubrir unos costes que nun dexen de medrar.

Falamos de factures de la lluz que nun dan tregua, del encarecimientu de les materies primes, de seguros sociales al alza, de cuotes d’autónomos asfixantes y, sobre too, d’unos alquileres que tán peles ñubes. Toos estos factores tán comiendo la rentabilidá de los chigres de siempres, convirtiendo l’esfuerciu d’un mes enteru nel pagu de la renta, que nun para de xubir. La patronal cellebra la facturación bruta, pero escaez el balance real. Tamos trabayando más pa ganar menos, o cenciellamente pa nun cayer.

Les cifres son un castañazu: Asturies perdió cuasi 600 establecimientos dende la pandemia. Nun presllen poles franquicies nin los grandes grupos; presllen los chigres que dan alma a les nueses cais y barrios. Y nun presllen porque nun tengan clientela, sinón porque nun ye viable un negociu onde, tres doce hores de trabayu al día y con una facturación aceptable, los númberos nun salen. Con esti ritmu d’encarecimientu de la vida y cola perda de poder adquisitivu de los nuesos vecinos, ye fácil prever que estes podríen ser les caberes Navidaes pa munchos negocios y, poro, pal paisaxe social y urbanu que conocemos.

This work is licensed under a Creative Commons Attribution 4.0 International License.