Ayeri, el barriu del Llano, en Xixón, convirtióse nun símbolu de resistencia y solidaridá. En plena dómina navidiega, un centenar de persones participaron nuna “bengalada” que tiñó de llume’l cielu y les cais pa desixir la llibertá de les Seis de La Suiza, seis sindicalistes condergaes a trés años y mediu de prisión pola defensa d’una trabayadora de la pastelería La Suiza, en Xixón

La movilización, convocada pol colectivu Sofitu a Les 6 de La Suiza, xuntó a alredor d’un centenar de vecinos y vecines que formaron una cadena humana delantre’l pabellón esportivu d’El Llano. L’actu foi una denuncia directa a la criminalización del sindicalismu y un recordatoriu claru: “facer sindicalismu nun ye delitu”. Les lluces navidiegues, qu’estos díes enllenan de colores el barriu, quedaron en segundu planu, eclipsaes por otra lluz más necesaria: la de la llucha polos drechos llaborales y les llibertaes sociales.

Dende’l grupu convocante calificaron esti 2025 como un añu “amargu” pola entrada en prisión de les sos compañeres nel Centru d’Inserción Social (CIS) El Urriellu, nel pasáu mes de xunetu. Sicasí, tamién sorrayaron los avances algamaos gracies al sofitu social, como la concesión del tercer grau, del que gocien anguaño les condergaes. Pa elles, esti logru ye frutu de “la solidaridá demostrada pola sociedá”, un puxu que-yos da fuercies pa siguir na llucha.

El colectivu tien la vista puesta nel 2026, con una meta que nun dexa llugar a duldes: algamar l’indultu pa les seis sindicalistes, una midida llargamente reclamada y que se considera la única salida xusta a una situación que calificaron como “una atroz inxusticia”. Porque, como repiten, “lo único que fixeron foi defender los drechos d’una trabayadora precaria. Nin más nin menos. Y eso nunca tendría que ser motivu de conderga”.

La bengalada d’El Llano nun foi solo un actu de protesta, foi un gritu colectivu d’acompañamientu: “Les 6 de La Suiza nunca van tar soles”. El barriu alzó la voz pa dexar claro que la llucha polos drechos nun s’apaga nin cola represión nin cola frialdá del iviernu. Y que, mientres haya inxusticia, va siguir habiendo lluz, fuercia y comunidá pa combatila.

✊ Llibertá pa les Seis de La Suiza. El sindicalismu nun ye delitu.

Llucía F. Marqués

This work is licensed under a Creative Commons Attribution 4.0 International License.