Dientro la coleición Cimbriella, dedicada a la sidre, la editorial Espublizastur vien d’asoleyar esta obra, que recueye los testimonios de 33 muyeres que curien de los raigaños de la sidre nes sos pumaraes
L’Ateneu Obreru de Villaviciosa acoyó la presentación del llibru “Muyeres qu’echen sidre”, una obra que rinde homenaxe a toles muyeres que col so trabayu caltienen vives les pumaraes d’Asturies.
Esti llibru complementa los anteriores de la mesma coleición, “Muyeres del llagar” y “Muyeres qu’echen sidre”, que recueyen los testimonios de mediu centenar de muyeres venceyaes a los llagares y d’otres tantes echaores de sidre, encadarmando una triloxía imprescindible pa pescanciar la importancia y la fuerte presencia de la muyer na cultura asturiana de la sidre, dende los sos anicios.
El llibru cuenta coles imáxenes del fotógrafu Luis José Vigil-Escalera (Lujó Semeyes) y los testos de Llucía Fernández.
Na presentación participó la Conceyala de Desendolcu Rural de Villaviciosa, Rocio Vega, el presidente del Conseyu Regulador de la DOP Sidra d’Asturies, Jorge García, Carme Pérez Antolín en representación de la editorial y l’autora de los testos, Llucía Fernández.
Esta cabera llanzó na so intervención un mensaxe a consumidores, hosteleros, llagareros y autoridaes a consumir, ufiertar, producir y sofitar la sidre fecho con mazana asturiana como únicu camín pa preservar la viabilidá de les pumaraes d’Asturies “ensin pumares, nun hai Cultura Asturiana de la Sidra que valga” apuntó, apelando a la obligación de les istituciones de velar pol padremuñu cultural sidreru y garantizar una rentabilidá a la sidre en tolos pasos del so procesu.
Pel so llau el presidente de la DOP aporfió na importancia de poner en valor el trabayu d’estes muyeres y del mundiu rural en xeneral, agradeciendo a la Fundación Asturies XXI, impulsora d’esta iniciativa, el reconocimientu fechu a les muyeres de los pumares.
Tres de la presentación ca una de les pumareres presentes recibieron un exemplar del llibru que firmó l’autora y como ramu del actu sacóse una semeya de familia y brindóse con sidre brut DOP.
Susana Sela
This work is licensed under a Creative Commons Attribution 4.0 International License.
