Villaviciosa va convertise esti 26 d’avientu nun espaciu de reconocencia y memoria colectiva cola presentación del llibru Pumareres. Muyeres del Pumar, una obra que pon nel centru la voz y l’esperiencia de les muyeres venceyaes al cultivu de la mazana y a la cultura de la sidre n’Asturies. L’actu va celebrase a les 12 hores en L’Ateneu Obreru de Villaviciosa
El llibru ye frutu d’un trabayu de campu basáu n’entrevistes y testimonios direutos, y combina los testos de Llucía Fernández coles semeyes de Lujó Semeyes. El resultáu ye un retratu coral que visibiliza un papel tradicionalmente silenciau nel ciclu productivu sidreru.
Pumareres. Muyeres del Pumar forma parte d’una llinia editorial centrada en construyir una mirada femenina y integral del mundu sidreru, xunto con otros títulos como Muyeres del llagar y Muyeres qu’echen sidre. El llibru cuenta col sofitu de la FMCDYUP del Ayuntamientu de Xixón y de la DOP Sidra de Asturias, y refuerza’l papel de Villaviciosa como referente cultural y mazaneru.
Na presentación van intervenir los autores, que van compartir col públicu el procesu creativu y la metodoloxía emplegada nel desarrollu del proyectu. L’actu va contar tamién cola presencia institucional del Ayuntamientu de Villaviciosa y de la DOP Sidra d’Asturies, amosando’l respaldu al calter cultural y patrimonial de la espublización.
La xornada va tener un momentu especial cola entrega d’un exemplar del llibru a caúna de les muyeres participantes, como muestra d’agradecimientu pola so collaboración y pola xenerosidá de los sos testimonios. Dempués, va haber una firma d’exemplares abierta a toles persones asistentes.
Amás, el públicu va recibir de baldre la publicación divulgativa ¿Qué ye la Cultura Asturiana de la Sidre?, editada pola Fundación Asturies XXI col sofitu de la Conseyería de Cultura, Política Llingüística y Deporte, qu’ufierta una visión xeneral del valor históricu, social y simbólicu de la sidre n’Asturies.
Susana Sela
This work is licensed under a Creative Commons Attribution 4.0 International License.
