El prósimu 30 d’avientu, na Sala de Xuntes de la Llaboral Ciudá de la Cultura, en Xixón, va celebrase la xornada de presentación d’Alfaya, la marca asturiana d’usu llingüísticu impulsada pola Conseyería de Cultura, Política Llingüística y Deporte. Na cita, la conseyera Vanessa Gutiérrez va esplicar en qué va consistir esti distintivu y cuáles van ser les sos llinies d’actuación.

Alfaya preséntase como una iniciativa pa reconocer a empreses y entidaes que faigan usu del asturianu nel so funcionamientu habitual. Un plantegamientu que, sobro’l papel, pue sonar razonable, pero que vuelve poner enriba la mesa una manera d’entender la política llingüística basada nos xestos voluntarios y nos reconocimientos simbólicos, más que nun compromisu firme y estructural cola llingua d’Asturies.

Resulta difícil nun reparar en que, nel anunciu d’esta xornada, nun se fai denguna referencia a la oficialidá del asturianu, l’asuntu central que sigue pendiente y que condiciona tola normalización real de la llingua. La oficialidá, llueñe de tar na axenda inmediata, paez quedar otra vuelta fora del discursu institucional, sustituyida por marques, sellos y distintivos que nun garanticen drechos nin usos estables.

Amás, la iniciativa xurde nun contestu especialmente contradictoriu: el mesmu Principáu que impulsa una marca d’usu del asturianu incumple de manera reiterada la toponimia oficial, aprobada conforme a derechu. Carreteres, documentación y comunicación institucional siguen ignorando formes oficiales, lo que debilita seriamente cualquier mensaxe sobro compromisu col asturianu.

Dende esti puntu de vista, Alfaya cuerre’l riesgu de ser una ferramienta más cercana a les dinámiques clientelares y al reconocimientu cosméticu qu’una política llingüística de fondu. Un distintivu que pue resultar útil pa la foto o pal currículu institucional, pero que nun afronta los problemes estructurales que sufre la llingua d’Asturies.

La xornada del 30 d’avientu va sirvir, polo menos, pa conocer con detalle qué se propón dende’l Gobiernu asturianu. Pero tamién va ser una bona ocasión pa recordar que’l futuru del asturianu nun se xuega nes marques, sinón na voluntá política real: na oficialidá, nel cumplimientu de la llegalidá vixente y nel exemplu de la propia Alministración. Too lo demás, per agora, son anuncios.

This work is licensed under a Creative Commons Attribution 4.0 International License.