La xusticia estima’l recursu de cinco trabayadores y ordena retrotraer la promoción interna a les bases orixinales
El Xulgáu de lo Social númberu 4 de Xixón estimó de forma íntegra la demanda presentada por cinco trabayadores d’Emulsa y declaró nules les bases modificaes del procesu de promoción interna a capataz de llimpieza, espublizaes el 4 d’ochobre de 2024. La sentencia considera que la empresa vulneró los principios constitucionales d’igualdá, méritu y capacidá, al alterar les regles del procesu una vegada zarráu’l plazu de presentación de solicitúes.
Según recueye’l fallu xudicial, Emulsa modificó requisitos del procesu cuando yá conocía quiénes se presentaren y qué méritos aportara ca aspirante, una actuación que la xueza califica de contraria a la igualdá d’oportunidaes. Estes modificaciones permitieron la entrada de nuevos aspirantes y camudaron de manera sustancial les condiciones d’accesu que figuraben nes bases iniciales.
La sentencia anula, ente otres, dos modificaciones clave: la eliminación escepcional del requisitu de titulación, introducida namás nesta convocatoria y non n’otros procesos de promoción interna de la empresa; y la incorporación sobrevenida del requisitu de nun tener sanciones mui graves dende 2019, un criteriu que dempués nun s’aplicó de manera homoxénea nel conxuntu de los procesos selectivos d’Emulsa.
Nel so razonamientu, la xueza afirma que la “deficiente actuación illexítima” de la empresa nun puede perxudicar a quien accedió al procesu conforme a les bases vixentes nel momentu de la so presentación, reforzando asina la necesidá de seguridá xurídica nos procedimientos de selección.
Anque la sentencia anula les bases modificaes, la xueza decide caltener la situación de los dos trabayadores que superaron el procesu, aplicando la doctrina del Tribunal Supremu sobre los “aspirantes de bona fe”, al entender que nun son responsables de les irregularidaes cometíes pola empresa.
Emulsa va tener de retrotraer el procedimientu a les bases orixinales aprobaes el 19 de xunu de 2024 y continuar el procesu namás coles 15 persones que presentaron la so solicitú nel plazu llegal, ente’l 20 de xunu y el 10 de xunetu de 2024. Amás, la empresa va dexar ensin efeutu la convocatoria espublizada el 26 de xunu de 2025 pa cubrir les places vacantes derivaes del procesu anuláu.
Dende la Seición Sindical del Colectivu de Trabayadores d’Emulsa sorráyase que la sentencia recuerda que, magar la so forma xurídica mercantil, Emulsa tien un calter públicu y ta obligada a respetar con escrupulosidá los principios d’igualdá, méritu y capacidá en tolos procesos de selección y promoción interna.
El pronunciamientu xudicial supón, según el colectivu sindical, un precedente relevante en defensa de la tresparencia y la seguridá xurídica nes empreses públiques llocales, y una llamada d’atención sobre la necesidá de que les regles de los procesos selectivos se caltengan estables y iguaes pa toles persones aspirantes dende’l primer momentu.
Susana Sela
This work is licensed under a Creative Commons Attribution 4.0 International License.
