El sábadu 20 d’avientu va cellebrase un actu solemne y abiertu a la ciudadanía pa recordar a les neñes y neños asesinaos en Gaza y denunciar la impunidá del xenocidiu, con una llectura pública de nomes y un cortexu de mortayes

El prósimu sábadu 20 d’avientu, a partir de les 11:30 hores, el conceyu de Sobrescobiu va acoyer el segundu actu territorial de llectura de nomes de neñes y neños muertos en Gaza. L’actu va entamar con un corteyu solemne de mortayes infantiles, en memoria de toles víctimes inocentes.

La convocatoria ta promovía por Coyanes por Palestina xunto con distintos colectivos del Altu Nalón, y forma parte de la segunda etapa de la campaña impulsada polos Colectivos Asturianos contra’l Xenocidiu Palestín, una plataforma que xune a más de sesenta organizaciones y colectivos d’Asturies. L’oxetivu de la campaña ye lleer nel territoriu asturianu los más de 18.000 nomes de menores fallecidos en Gaza, recoyíos pol Ministeriu de Salú de Gaza nun llistáu consideráu rigorosu poles Naciones Xuníes, como exerciciu de testimoniu, reflexión y denuncia. La iniciativa entamó con un primer actu cellebráu’l pasáu 11 d’ochobre nel Centru Niemeyer.

L’actu de Sobrescobiu va dar empiezu con una concentración nel Pedrosu, en Rioseco, delantre de la Casa la Cultura Vicente Álvarez. Dende ellí saldrá un desfile solemne con mortayes infantiles fasta la Plaza del Ayuntamientu de Sobrescobiu, onde se va zarrar l’actu con una llectura pública y solemne de 180 nomes, unu por cada cien neñes y neños asesinaos pol Estáu d’Israel. Esti xestu simbólicu representa’l duelu colectivu poles vides arrancaes y la necesidá de caltener viva la so memoria, nun actu austeru pero fondamente espresivu, abiertu a tola ciudadanía.

El llistáu de nomes nun recueye les víctimes de los últimos meses nin les que siguen produciéndose, inclusive baxo un alcuerdu de paz impuestu y inxustu que nun ufierta garantíes reales. Amás, el númberu total de menores asesinaos ye entá mayor, yá que munchos cuerpos siguen soterraos baxo los escombros d’un territoriu devastáu tres más de dos años de destrución continuada.

L’actu de Sobrescobiu súmase a los cellebraos nos seis campus universitarios asturianos el miércoles 26 y en venti istitutos d’educación secundaria de tol país el vienres 28, dientro d’una dinámica descentralizada y compartida en tol territoriu. Esta serie d’aiciones entamó con un primer actu territorial en Vegadeo’l sábadu 29 de payares.

Toles convocatories tienen como oxetivu llamar a la reflexión y a la denuncia de crímenes que nun pueden quedar ensin castigu. Crímenes frente a los que la sociedá nun puede permanecer ayena, especialmente nos ámbitos de la educación, la cultura o l’esporte, porque la indiferencia y la inacción tamién son formes de complicidá.

Llucía F. Marqués

This work is licensed under a Creative Commons Attribution 4.0 International License.