En Coya, conceyu Piloña, son los vecinos los que salven de la ruina un horru catalogáu del sieglu XVII, xuntando 14.000 euros pa la so restauración ante la ineficiencia de les alministraciones. Un exemplu d’autoorganización que pon de manifiestu cómo la defensa del padremuñu asturianu recái, una y otra vegada, nel pueblu

Ante la ineficiencia manifiesta de les alministraciones a la hora de curiar del padremuñu colectivu, ye la vecindá la que, una vegada más, tien que dar un pasu alantre pa rescatar lo que ye de toos. En Coya  la salvación d’un horru catalogáu del sieglu XVII nun ye consecuencia d’un plan públicu nin d’una estratexa seria de caltenimientu, sinón del cansanciu y la determinación de los vecinos, qu’a traviés de l’Asociación El Roblón de Coya, nun quixeron dexar que la edificación acabara engrosando la llista de ruines del abandonu institucional.

Foron ellos quien xuntaron los 14.000 euros necesarios pa evitar la so perda definitiva, depués de que’l propietariu lo donara y cuando yá menaciaba con quedar, namás, como testimoniu d’una desidia crónica. L’horru, d’un valor singular polos sos grabaos únicos y pola peculiaridá de contar con cuatro puertes, presentaba una esquina baltada, col agua entrando ya un deterioru que nun daba munchu marxe. La reacción vecinal, sicasí, foi decidía: rifes, eventos y actividaes diverses permitieron algamar los fondos imprescindibles, que se sumen a una sovención de menos de 5.000 euros apurrida pola Conseyería de Cultura, una cantidá tan simbólica como insuficiente pa un bien d’esti caláu.

Gracies a esi esfuerzu colectivu, l’horru va iguase y va dase-y usu como oficina de l’Asociación Vecinal El Roblón, asegurando asina non solo la so conservación, sinón tamién la so integración na vida diaria del pueblu. Nun foi la responsabilidá llegal nin el compromisu públicu lo que sostuvo esti bien, sinón la imposibilidá de la xente de siguir viendo cómo se desaniciaba una parte fundamental de la so hestoria.

Pero la historia de Coya nun dexa de ser una esceición afortunada. Nun hai tanta suerte pa la mayoría de los horros que, per toa Asturies, tan dexándose cayer ensin que nadie mueva un deu, pesi al enorme pesu identitariu y padremuñal que representen o precisamente por ello. Ca rescate vecinal pon al descubiertu non solo’l querer polo nueso de los asturianos, sinón tamién el fracasu reiteráu d’unes alministraciones que siguen mirando pa otru llau mientres se nos desfae, pieza a pieza, otra parte de lo que somos.

Llucía F. Marqués

This work is licensed under a Creative Commons Attribution 4.0 International License.