La denuncia ciudadana y la intervención d’Iniciativa pol Asturianu consiguieron que la señalética del nuevu intercambiador de Llugones se corrixera p’adaptala a la toponimia oficial, depués de detectase un incumplimientu que vulneraba la normativa vixente

La presión popular llogró finalmente el cambéu de la señalética nel nuevu intercambiador de Llugones, qu’agora incorpora correutamente’l topónimu oficial. La situación salió a la lluz depués de que un vecín denunciara l’erru na denominación del equipamientu, una quexa que foi treslladada a Iniciativa pol Asturianu, organización que darréu se puso en contautu cola Viceconseyería d’Infraestructures pa reclamar la igua inmediata del cartelu.

Tres la reclamación formal, l’alministración aceutó l’erru y procedió a modificar la señalización, que yá pue vese nel intercambiador en formatu billingüe y respeutando la toponimia oficial de Llugones. Dende Iniciativa pol Asturianu valoren positivamente la rápida reacción nesta ocasión, destacando que la correición ye frutu direutu de la vixilancia ciudadana y del exerciciu activu de los drechos llingüísticos.

Casos como esti puen denunciase al traviés del Buzón del Asturianu, una ferramienta de baldre y abierta a tola ciudadanía, creada pa canalizar quexes frente a alministraciones, instituciones y empreses que vulneren los drechos llingüísticos de los falantes. El buzón sirve tamién pa facer llegar felicitaciones a aquelles entidaes que dan pasos alantre na normalización y nel respetu al drechu a vivir n’asturianu.

Col Buzón del Asturianu, Iniciativa pol Asturianu ufierta asesoramientu y sofitu a les persones que s’atopen con torgues pa desenvolver la so vida diaria na llingua propia, acompañándoles nel procesu de reclamación. Amás, la organización recueye toles denuncies, suxerencies, consultes y reconocimientos recibíos pa ellaborar un informe añal, que va permitir facer siguimientu de les problemátiques más habituales y evaluar el grau de cumplimientu de los drechos llingüísticos n’Asturies.

Susana Sela