Situaciones d’asturfobia comu esta desapaeceríen dafechu col reconocimientu de la oficialidá del asturianu

La Llei 1/1998, de 23 de marzu,, d’usu y promoción del bable asturianu, sigue siendo una norma vixente que regula los drechos de la ciudadanía a usar l’asturianu y la obligación de l’alministración pública de garantizar que esos drechos se cumplan. Aprobada pola Xunta Xeneral del Principáu d’Asturies y espublizada nel mesmu 1998, recueye nel so Capítulu II, artículu cuartu, el drechu a utilizar l’asturianu, tanto de mou oral como escritu, nes rellaciones cola alministración.

Pasaron yá 26 años dende la so aprobación y, sicasí, inda son munches les persones que la desconocen… o que conociéndola, a cencielles, nun l’apliquen.

Un exemplu reciente ye’l de Mª del Pilar Iglesias Salgado, secretaria del Conceyu Sotu’l Barcu, que vien de refugar un escritu presentáu por Horru on line nel que se solicitaba información sobre l’esbarrumbe d’un hórreo en Foncubierta. La negativa basóse en esquivar la obligación llegal d’apurrir esa información, alegando que “la solicitud no ha sido formulada en lengua oficial”, faciendo una interpretación personal y claramente restrictiva de la llei, hasta’l puntu de llendar la so aplicación al supuestu “ámbitu autonómicu”.

Nun ye momentu de perder tiempu en discutir si la llei ye aplicable a nivel de país y non a nivel de conceyu, o si esti caberu forma parte o non d’Asturies. Lo que toca ye reconocer d’una vez la oficialidá del asturianu y dexar de dar cuerpu a escuses tan probes como recurrentes, que namás sirven pa contentar a quien sigue negando drechos llingüísticos básicos. Mientras la oficialidá nun seya real y efectiva, estes situaciones van siguir repitiéndose.

Llucía F. Marqués

This work is licensed under a Creative Commons Attribution 4.0 International License.