“La falta d’usu de los recursos públicos nun ye un accidente nin una fatalidá administrativa: ye una decisión política que tien consecuencies direutes na probitú sanitaria del país y nel futuru d’un sistema públicu que, ensin plantes cerraes y ensin retrasos innecesarios, podría dar muncho más de lo que ta dando” -Andecha Astur-
El Principáu lleva meses vendiendo la idea de que’l SESPA ta impulsando midíes pa optimizar la xestión del bloque quirúrxicu y menguar los tiempos d’espera nel HUCA. Sicasí, les cifres d’esti añu dibuxen un panorama que dista muncho de la eficacia qu’anuncia l’Alministración. N’agostu de 2025, la llista d’espera quirúrxica global n’Asturies sumaba 21.884 pacientes. En payares, la cifra yá superaba les 22.000 ciruxíes pendientes, amestando a ello 113.000 persones aguardando una primer consulta con especialistes.
Mentantuo, l’Hospital Universitariu Central d’Asturies caltién una parte significativa de les sos instalaciones ensin actividá plena. De les 27 plantes que conformen el edificiu, l’equivalente a más de cinco tán cerrades, con seis funcionando namás al 50% y otres cinco en situación d’infrautilización crónica. Esti escenariu repítese d’un pisu a otru: traumatoloxía lleva meses con dos plantes abríes a medies, ensin recuperar la so capacidá completa; cirugía plástica acumula mediu añu con media planta clausurada, ensin qu’espliquen a la ciudadanía cuándo va retomase l’actividá normal.
La resultancia d’estos cierres parciales ye evidente y socialmente doliosa. Millares de pacientes con enfermedaes tratables ven cómo la espera s’allarga mientres l’estáu de salú apiora. Otros cientos acaben derivaos a la sanidá privada, nun fenómenu que yá ye imposible de negar. Les instalaciones públiques queden arrodiades d’una política d’infrautilización que, darréu, sofita una derivación constante de recursos y actividá escontra centros privaos.
Dende’l coleutivu Muévite pola Salú Pública recordaben ayeri nun comunicáu que “la salú ye un drechu y non un negociu, y la defensa d’esti drechu tien de comprometer inescusablemente a les istituciones públiques”. Pel so llau, dende Andecha Astur recalquen que “cuando un hospital de referencia como’l HUCA queda llueñe d’esplotar tola so capacidá, los costes sociales y vitales paguenlos les persones enfermes”, apuntando a una intencionalidá nidia. “La falta d’usu de los recursos públicos nun ye un accidente nin una fatalidá administrativa: ye una decisión política que tien consecuencies direutes na probitú sanitaria del país y nel futuru d’un sistema públicu que, ensin plantes cerraes y ensin retrasos innecesarios, podría dar muncho más de lo que ta dando”.
Nel Dos Santos
This work is licensed under a Creative Commons Attribution 4.0 International License.
