La declaración d’impactu ambiental de la planta de metanol del Musel asoléyase ensin atender les alegaciones ecoloxistes nin de los vecinos
La Conseyería de Movilidá, Mediu Ambiente y Xestión d’Emerxencies vien d’espublizar la declaración d’impactu ambiental del proyectu Planta de producción y almacenamiento de metanol verde–Musel Green Met, previstu nel puertu de Xixón. La resolución llega, una vez más, ensin que se tengan en cuenta les alegaciones presentaes pola Coordinadora Ecoloxista d’Asturies, que vien postulándose en contra d’una instalación llamada a producir 100.000 t/año de metanol a partir de 140.000 t/año de CO₂ y 20.000 t/año d’hidróxenu.
El proyectu inclúi una planta d’electrólisis de 50 MW na so primer fase, con posibilidá d’ampliación a 100 MW, y prevé un suministru esternu d’hidróxenu pa complementar la potencia instalada. Sicasí, y según remarcan los colectivos ecoloxistes, la iniciativa llega n’un momentu de claru estancu de los múltiples proyectos d’hidróxenu verde impulsaos n’Europa, dellos d’ellos con subvenciones abondes que, a la vista de la evolución del mercáu, presenten agora un escasu percorríu real.
L’emplazamientu escoyíu pa la planta ta arrodiaú de numberoses industries contaminantes y, nun radiu de tan solo tres quilómetros, viven miles de vecinos tanto de Carreño como de Gijón. La cercanía de zones residenciales, especialmente la de la playa y entornu de Xivares, ye una de les principales quexes treslladaes polos veceros, qu’alcuentren a menos d’un quilómetru de la futura instalación.
El consumu d’agua ye otru de los puntos críticos. La planta precisa 68.900 litros/hora na Fase 1 y 106.000 litros/hora na Fase 2, lo que supondría más de 603.000 m³ anuales nes operaciones iniciales y cerca de 929.000 m³ na ampliación. En plena situación de cambéu climáticu y con una rede d’abastecimientu llindada, la Coordinadora considera inaceptable destinar agua potable a usos industriales d’esta magnitú. Reivindiquen que tola agua emplegada sía residual depurada o bien procedente d’aguas pluviales, opción que la documentación oficial nun garantiza.
La organización alerta tamién del riesgu qu’implica’l metanol, un compuestu tósicu ya inflamable. La posible formación d’atmósferes explosives incrementa’l riesgu d’incendiu y, con ello, la formación de nubes tósiques que podríen afeutar gravemente a les viviendes más prósimes. Amás, denuncien que nun esiste una evaluación real de la viabilidá de la conexión del sistema de saneamientu cola infraestructura del emisariu actual, nin se detalla’l puntu de control previu a esa conexión.
Otra de les desixencies de los colectivos verdes ye’l tipu d’electrolizadores emplegaos. Sostienen que la planta tendría de descartar los modelos alcalinos o d’óxidu de sodiu, al xenerar mayores volúmenes de residuos, y apostar únicamentu por electrolizadores PEM, consideraos de menor impautu ambiental.
Tampoco s’especifica’l dimensionamientu nin la llocalización de los tanques d’emerxencia. Les previsiones apunten a un númberu eleváu d’almacenamientu —26 tanques d’hidróxenu y otros, ensin detallar, de metanol— al que se sumen seis torres de refrixeración de 20 metros y una antorcha de 45 metros d’altor. Toes estes cadarmes van ser visibles dende la frecuentada zona costera de Xivares, polo que la Coordinadora demanda midíes per reducir un impautu visual que, sicasí, nun recueye la resolución agora espublizada.
Dende la Coordinadora Ecoloxista anuncien que van siguir xixilantes nel casu de que’l proyectu llegue finalmente a executase, daqué qu’agora mesmo califican de “inciertu” nel contestu xeneral de los proyectos d’hidróxenu verde. Aseguren que, de siguir avanzando, van facer tolo posible pa que l’impautu sobre vecinos y mediu seya’l menor dable.
Llucía F. Marqués
This work is licensed under a Creative Commons Attribution 4.0 International License.
