Andecha Astur llama a abrir un alderique públicu sobre’l modelu de país que se quier construyir, priorizando la inversión p’afalar la vida y non la guerra. La organización soberanista carga duramente contra la estratexa industrial del Gobiernu del Principado, al qu’acusa d’“enfotáu en presentar la industria armamentística como motor d’Asturies”.

Nel so caberu posicionamientu públicu, la formación califica esta deriva como “una opción política inalmisible ética y moralmente”, que normaliza la guerra y maquilla’l so impautu social, económicu y humanu.

L’orixe de la polémica ta nes declaraciones del presidente asturianu Adrián Barbón, que vien defendiendo les posibilidaes d’un sector con “efectu tractor y capacidá d’arrastre” sobro la economía asturiana. P’Andecha Astur, esti discursu “oculta la realidá evidente: que la producción d’armamentu tien implicaciones étiques, sociales y humanes innegables, que nun pue tratase como un sector neutru”.

Nel so análisis, Andecha Astur recuerda que “cualisquier blindáu, proyectil o sistema de combate producíu n’Asturies nun tien otra función qu’alimentar conflictos”. Consideren éticamente inaceutable plantegar la guerra como modelu de desarrollu económicu, y menos entá, dicen, “nun país ensin soberanía industrial real”.

La organización denuncia amás que’l sector armamentísticu que se promueve dende’l Gobiernu asturianu ye totalmente dependiente de los intereses determinaos por grandes multinacionales y pol Ministeriu de Defensa d’España, polo que ven a Asturies actuando “como peón, non como suxetu”. Comparen esta situación cola historia industrial del país, marcada pola dependencia y la vulnerabilidá, “pero agora cola derivada belicista, inmoral y ensin ética dala”.

L’otra gran crítica diríxese al vacíu planificador. Andecha Astur acusa al Gobiernu de carecer d’un proyeutu social, políticu y económicu que dea contestu a los retos d’Asturies, al tiempu que caltién polítiques que —según la organización— profundicen na desindustrialización, nel deterioru del texíu socioeconómicu tradicional, na precarización llaboral, na emigración forciada de la mocedá, nel despoblamientu rural, na privatización de servicios esenciales, na masificación turística y na falta de vivienda.

Nel so manifiestu, Andecha Astur reivindica una alternativa basada na industria civil y la teunoloxía con fines pacíficos, la transición ecolóxica, el fortalecimientu del sector enerxéticu, l’agroindustria y la soberanía alimentaria, l’economía social y cooperativa, y una inversión pública decidida nel bientar y nes comunicaciones.

Consideren que’l país “tien capacidá humana y económica p’asitiar un futuru propiu”, pero que pa ello faen falta soberanía y un gobiernu qu’atienda a los intereses d’Asturies y del pueblu asturianu, non —afirmen— “a los mandatos de Madrid y de les multinacionales”.

Andecha Astur desixe refugar cualquier proyectu d’implantación o desendolcu d’industrieas belicistes nel territoriu as, al nun tener “otra fin qu’acabar cola vida de persones, na mayoría población civil”, y ponen como exemplu la violencia que se ve “día ente día en Gaza y Cisxordania”. “Asturies”, conclúin, “necesita un proyeutu políticu, social y económicu soberanu, al serviciu del pueblu asturianu, non d’intereses esternos y muncho menos si son belicistes”.

Llucía F. Marqués

This work is licensed under a Creative Commons Attribution 4.0 International License.