La sentencia non solo devuelve l’actividá a dos cuadres concretes, sinón que reabre l’alderique sobre’l futuru de la ganadería a pequeña escala nos conceyos del oriente asturianu, onde la convivencia d’usos tradicionales y les normatives actuales vien xenerando conflictos ca vegada más avezaos 

Suarías (Peñamellera Baxa) vivió’l 24 de payares un episodiu d’alta tensión vecinal cola clausura de dos cuadres de ganáu bovín. La intervención, realizada por operarios municipales y en presencia de la Guardia Civil tres la denuncia d’un vecín, desencadenó una concentración de protesta na que participó bona parte’l pueblu, xunto con sindicatos ganaderos y representantes políticos.

Una selmana más tarde, la decisión quedó revocada. La sentencia’l xulgáu de primer instancia declaró que se trata de ‘cuadres tradicionales de bovín, preesistentes dende tiempu inmemorial, con usu ganaderu históricu ya ensin ampliaciones o cambeos estructurales recientes’. Con esti pronunciamentu, el xuez tumbó l’actuación municipal y dio la razón a los propietarios.

Dende UCA, una de les organizaciones presentes nel conflictu, valoren la sentencia por reafitar ‘el drechu de los ganaderos a caltener les sos cuadres tradicionales nos núcleos rurales cuando cumplen con tolos requisitos urbanísticos, ambientales y sanitarios desixíos’. L’entidá destaca qu’esta resolución —y les anteriores en casos asemeyaos— marca un criteriu firme: les cuadres tradicionales, cuando respeten les midíes téuniques vixentes, son plenamente compatibles cola vida nos pueblos y cuenten, amás, con proteición esplícita na normativa urbanística y ambiental.

Susana Sela

This work is licensed under a Creative Commons Attribution 4.0 International License.